رۇسىيە ئامېرىكا ئايروپىلانلىرىنىڭ ھاۋا تەۋەلىكىگە دەخلى قىلىشىنىڭ ئالدىنى ئالغانلىقىنى بىلدۈردى

تۈركىيە ئاۋازى رادىيوسى خەۋىرى: رۇسىيە دۆلەت مۇداپىئە مىنىستىرلىقى بايانات ئېلان قىلىپ، بالتىق دېڭىزدا ئامېرىكا ھاۋا ئارمىيەسىنىڭ ئىككى دانە «В-52Н» تىپلىق بومباردىمانچى ئايروپىلانىنىڭ رۇسىيە ھاۋا مۇداپىئە سىستېمىسى تەرىپىدىن بايقالغانلىقىنى ئۇقتۇردى؛ باياناتتا: «غەربىي ھەربىي رايون ھاۋا مۇداپىئە قىسىملىرىنىڭ <Su-35> تىپلىق ئۇرۇش ئايروپىلانى رۇسىيە فېدېراتسىيەسى چېگراسىغا خىلاپلىق قىلىنىشىنىڭ ئالدىنى ئېلىش ئۈچۈن قوزغالدى. بۇ ئايروپىلان ھاۋادىكى بەلگىلەنگەن رايونغا ئورۇنلاشتۇرۇلدى. رۇسىيە ئايروپىلانى چەت ئەل ئۇرۇش ئايروپىلانلىرى دۆلەت چېگراسىدىن يىراقلاشقاندىن كېيىن ھاۋا ئارمىيە بازىسىغا قايتىپ كەلدى» دېگەن ئىبارىلەرگە ئورۇن بېرىلدى.

رۇسىيە ئۇرۇش ئايروپىلانىنىڭ خەلقئارا ھاۋا تەۋەلىكىدىن پايدىلىنىش قائىدىلىرىگە ئۇيغۇن ئۇچقانلىقى ئەسكەرتىلگەن باياناتتا، چېگراغا خىلاپلىق قىلىشقا يول قويۇلمىغانلىقى تەكىتلەندى.

ئۆتكەن ھەپتە قارادېڭىزدا ئامېرىكانىڭ «MQ-9» تىپلىق بىر ئۇچقۇچىسىز ھاۋا ئاپپاراتى، رۇسىيە ئۇرۇش ئايروپىلانلىرىنىڭ پاراكەندىچىلىكىگە ئۇچراپ خەلقئارا دېڭىز تەۋەلىكىگە چۈشۈپ كەتكەنلىكى بىلدۈرۈلگەنىدى.