мәдәнийәт - сәнәт дунйаси түркийәгә йардәм бериш чақириқида болмақта

түркийә авази радийоси хәвири: америкалиқ нахшичи вә артис селена гомез аммиви ортақлишиш тор бети Instagram сәһиписидики  377 милйон әгәшкүчиси билән бирликтә, харабиликләрниң астидин қутқузувелинған бир балиниң сүритини вә бирләшкән дөләтләр тәшкилати балилар фонди (UNICEF) тор бетиниң йардәм сәпәрвәрлик паалийәтлириниң улинишини һәмбәһирләп мундақ деди: «сүрийә вә түркийәдики йәр тәврәштә талапәткә учриғанлар үчүн йүриким йерилип кәтти.»

шакираму аммиви ортақлишиш тор бети Instagram сәһиписидә, харабилик астидин қутқузувелинған бир балиниң сүрити үстигә, түркийә вә сүрийәдики йәр тәврәш апитиниң балиларға көрсәткән қаттиқ тәсирини ишарәтләп,  бирләшкән дөләтләр тәшкилати балилар фонди тор бетиниң йардәм сәпәрвәрлик паалийәтлириниң улинишини әгәшкүчилири билән ортақлашти.

америкалиқ нахшичи вә артис җеннифер лопез болса, өзиниң түркийә вә сүрийәдики мәстанилиригә йардәм әвәткәнликини байан қилип мундақ деди: «бу һәр 100 йилда бир қетим районға еғир талапәтләрни йәткүзидиған әң күчлүк йәр тәврәш.»

лопез бирләшкән дөләтләр тәшкилати балилар фондиниң тор бетиниң йардәм сәпәрвәрлик паалийәтлириниң улинишини әгәшкүчилири  билән ортақлишип, уларни бу улиниш арқилиқ түркийә вә сүрийәдики талапәткә учриған балиларға йардәм беришкә чақирди.

һиндистанниң даңлиқ артиси җеннифер вингет аммиви ортақлишиш тор бети Twitter сәһиписидә елан қилған  учурида, өзиниң йәр тәврәш районлиридин тартилған  фото- сүрәтләрни қаттиқ азаб  - оқубәт ичидә көргәнликини вә талапәткә учриғанларға дуа қиливатқанлиқини ейтти.

« Lost <ғайиб>» вә «24» намлиқ телевизийә тийатирлиридики роли билән тонулған америкалиқ артис лана паррилла, өзиниң түркийә вә сүрийә хәлқлири үчүн дуа қиливатқанлиқини әскәртип мундақ деди: «мән түркийә вә сүрийәдә йүз бәргән бу қорқунчлуқ йәр тәврәш апитини көрүп чәксиз азаб  - оқубәт деңизиға чөкүп кәттим. һес – туйғулиримни толуқ ипадиләп беришкә сөз тапалмайватимән.»

фирансийәлик модел сенастийен бетсч аммиви ортақлишиш тор бети Instagram сәһиписидә елан қилған учурлирида, өзиниң түркийәдә тартқан фото- сүрәтлиридин сирт йәнә, йәр тәврәш апитидин кейин тартилған фото -сүрәтләрниму һәмбәһирлиди.

бетсч, әгүшкүчилирини «‹AHBAP› җәмийити» гә ианә қилиш арқилиқ сүрийә вә түркийәдики талапәткә учриғанларға йардәм беришкә чақирди, һәмдә түркийәдә йүз бәргән икки чоң йәр тәврәш апитидин қаттиқ азабланғанлиқини әскәртип мундақ деди: «мән шундақ тәләйлик идимки, түркийә хәлқиниң кәң қорсақлиқиға биваситә шаһит болған идим. һазир уларниң бу кәң қорсақлиқи үчүн җаваб қайтуруш бизниң ихтийарлиқимизда.»

испанийәлик музикант енрик иглесиас аммиви ортақлишиш тор бәтлиридики сәһипилиридә, « Save The Children <балиларни қутқузуш>» тәшкилатиниң тор бетиниң йардәм паалийитиниң улнишини  һәмбәһирләп мундақ деди: «түркийә вә сүрийә һазир һәқиқәтән бизниң йардимимизгә моһтаҗ. әгәр мумкин болса, сөйгүңизни һазирниң өзидила изһар қилиң, йардәмлириңизни вә ианилириңизни дәрһал әвәтиң.»

дунйаға даңлиқ ашпәз җәмие оливер, өзиниң аммиви ортақлишиш тор бәтлиридики сәһипилиридә, түркийә вә сүрийәдә йүз бәргән йәр тәврәш апитидә талапәткә учриғанларниң дәрд – әләмлирини ортақлишиватқанлиқини әскәртти, һәмдә мәркизи әнгилийәгә җайлашқан җиддий әһвалларға тақабил туруш комитети (DEC) ниң түркийә вә сүрийә үчүн йардәм паалийәтлирини ишқа кириштүргәнликини тәкитлиди.

америкалиқ артис софийә карсон,  аммиви ортақлишиш тор бети Instagram сәһиписидә елан қилған бирләшкән дөләтләр тәшкилати балилар фонди (UNICEF) ниң инсанпәрвәрлик йардәм паалийитигә мунасивәтлик  синлиқ учурида, түркийәдики балиларниң дунйаниң һәрқайси җайлиридин келидиған йардәмгә моһтаҗ икәнликини тәкитлиди.