iran parlaménti shangxey hemkarliq teshkilatigha ezaliq layihesini testiqlidi

türkiye awazi radiyosi xewiri: iranliq oqughuchilar xewer agéntliqining(İSNA)  xewiride bildürülishiche, iran parlaméntida ötküzülgen muzakire yighinida, shangxey hemkarliq teshkilatigha eza bolush qarar layihesining munasiwetlik maddiliri we tepsilatliri talash-tartish qilinip, awazgha qoyulghan.

iranning shangxey hemkarliq teshkilatigha toluq eza bolush qarar layihesi üchün ötküzülgen bélet tashlashqa, 237 parlamént ezasi qatnashqan bolup, bularning 203 nepiri qollighan, üch nepiri ret qilghan, töt nepiri awaz bérish hoquqidin waz kechken.

qarar layihesi boyiche, rayon teshkilatliri bilen iqtisadiy, medeniyet, xewpsizlik we siyasiy munasiwetler hemde özara hemkarliqlarni kücheytish meqsitide, iran hökümitining shangxey hemkarliq teshkilatigha eza dölet salahiyitini qolgha keltürüsh üchün, mezkur teshkilat qurulghandin tartip bügüngiche qobul qilinghan 49 höjjetni imzalishigha hoquq bérilidu.

iran 2005-yili shangxey hemkarliq teshkilatigha közetküchi dölet süpitide qatnashqan bolup, toluq ezaliq basquchi 2021-yili séntebirde bashlanghan idi.

iran tashqi ishlar ministiri hüseyin emir abbdullahiyan 14-séntebirde özbékstanning semerqent shehiride iranning shangxey hemkarliq teshkilatigha toluq eza bolushigha munasiwetlik wedinamesini teshkilat katipi jang ming bilen imzalighanliqlirini élan qilghan idi.

1996-yili xitay, rusiye, qazaqistan, qirghizistan we tajikstan wekillirining shangxeyde chégra rayonlirida herbiy ishenchni chongqurlashturush kélishimini imzalishi bilen «shangxey besh dölet teshkilati» qurulghan idi.

türkiye mezkur teshkilatning «diyalog shériki» döliti süpitide eza. 2001-yili özbékstanning eza bolushi bilen, bu teshkilatqa eza bolghan dölet sani alitige chiqqan we ismi shangxey hemkarliq teshkilatigha özgertilgen idi. kéyinche, pakistan bilen hindistan ezaliqqa qobul qilinghan idi.