jinayi ishlar soti: qolimizda liwiyediki kolléktip mazargha dair ishenchlik uchurlar bar
xelqara jinayi ishlar sot mehkimisi, liwiyedin tépilghan 11 kolléktip mazar heqqide urush jinayiti yaki insaniyetke qarshi turush jinayitining ispati bolalaydighan ishenchlik uchurgha érishkenlikini uqturdi.
türkiye awazi radiyosi xewiri: xelqara jinayi ishlar sot mehkimisi bash teptishi fatu bénsuda yazma bayanat élan qilip, mehkimining, liwiyening sherqidiki qanunsiz qoralliq küchlerning rehbiri xelipe hafterge qarashliq xelq eskerliridin xaliylashturulghan terhune we uning etrapidin 11 dane kolléktip mazar toghrisida ishenchlik uchurlarning yétip kelgenlikini bildürdi.
mezkur uchurlarning liwiyege munasiwetlik dawamlishiwatqan tekshürüshlerning dairisige kirgüzülüshining mumkinlikini eskertken bénsuda, «biz liwiyediki 11 kolléktip mazar toghrisida ishenchlik uchurgha ige bolduq. uchurlar urush jinayiti yaki insaniyetke qarshi turush jinayitining sadir qilinghanliqigha pakit bolalaydu» dédi.
gerche liwiye xelqara jinayi ishlar sot mehkimisining qurulush kélishimi bolghan rim nizamnamisige qatnashmighan bolsimu, sot mehkimisi, birleshken döletler teshkilati xewpsizlik kéngishining qararigha asasen liwiyede sadir qilinghan jinayetlerni tekshürüsh hoquqigha érishkenidi.
