wénézuéla: türkiyening hamiy dölet bolushini teklip qilduq, biraq...
wénézuélaning birleshken döletler teshkilati (b d t) da turushluq daimiy wekili samuél monkada, dölitining washingtondiki elchixanisining qoghdilishi üchün türkiyening hamiy dölet bolushini teklip qilghanliqlirini bildürdi.
türkiye awazi radiyosi xewiri: monkada b d t merkiziy binasida ötküzgen muxbirlarni kütüwélish yighinida, amérikining wénézuélaning washingtondiki elchixanisini boshitish qarari toghrisida toxtaldi.
amérika bilen wénézuéla arisidiki diplomatik munasiwetlerning üzülgenlikini we wiyénna ehdinamisidiki diplomatik munasiwetler belgilimisining rohigha asassen, amérikining paytext karakastiki elchixanisi üchün üchinchi bir dölet süpitide shiwéytsariyeni tallighanliqini bildürgen monkada, «bizmu türkiyening hamiy dölet bolushini teklip qilduq. teklipimizni <biz silerni étirap qilmaymiz> dep ret qildi, guaydoni étirap qilidighanliqlirini bildürdi» dédi.
amérika dairiliri, xélidin buyan namayishchi we paaliyetchiler nöwette turuwatqan wénézuélaning washingtondiki elchixanisini boshitish üchün qanuniy musapining bashlighanliqini bildürgenidi.
amérika tashqi ishlar ministirliqi, elchixanining wénézuélada özini muweqqet pirézidént dep élan qilghan öktichi parlamént bashliqi xuwen guaydogha ait ikenlikini eskertip , «wénézuéla pirézidénti nékolas maduroni étirap qilmaydighanliqlirini, shunga maduroni qollighuchi namayishchilarning elchixanida turushining qanunsiz ikenlikini ilgiri sürgenidi.
