америка венезуелаға инсанпәрвәрлик йардими қилишқа тәййар икәнликини билдүрди
америка һөкүмити венезуелада өзини «вақитлиқ пирезидент» дәп елан қилған хуән гуайдо тәләп қилған әһвалда 20 милйон доллаардин көп инсанпәрвәрлик йардәм қилишқа тәййар икәнликини елан қилди.
түркийә авази радийоси хәвири: америка һөкүмити түнүгүн (24-йанвар) венезуелада өзини «вақитлиқ пирезидент» дәп елан қилған вә өктичиләр мутләқ үстүнлүкни игиләйдиған дөләт парламентиниң башлиқи хуән гуайдониң инсанпәрвәрлик йардәм тәлипигә бинаәт 20 милйон доллардин көп йардәм қилишқа тәййар болғанлиқини елан қилди.
хуән гуайдо америка ташқи ишлар министири помпейоға әвәткән мәктубини «венезуеланиң вақитлиқ пирезиденти» сүпитидә йазғанлиқини әскәртип, америка һөкүмитидин инсанпәрвәрлик йардәм қилғанлиқини қәйт қилди.
америка ташқи ишлар министири майк помпейо «американ дөләтлири тәшкилати» (OAS) да қилған сөзидә, хуән гуайдониң мәктубиға: «тәләпкә бинаән венезуела хәлқигә инсанпәрвәрлик йардимини йәткүзүшкә тәййармиз. бүгүн американиң венезуела хәлқигә 20 милйон доллардин көп инсанпәрвәрлик йардими қилишқа тәййар икәнликини җакарлаймән. бу фонд дөлитидики сийасий вә иқтисадий киризисларниң тәсири билән еғир шәкилдики йемәк-ичмәк вә тиббий әслиһәләрниң йоқлуқиға дуч кәлгән хәлқләргә йардәм қилишни мәқсәт қилиду» дәп җаваб бәргәнликини билдүрди.
у американиң венезуеланиң қайтидин қурулуши вә иқтисадиниң оңшилиши үчүн техиму көп йардәмләрни қилишқа тәййар икәнликини тәкитләп, «американ дөләтлири тәшкилати» ға әза дөләтләрни, хуән гуайдони венезуеланиң «вақитлиқ пирезиденти» дәп етирап қилишқа чақирди.
түнүгүн (24-йанвар) венезуелада өктичиләр вә мадуро һакимийитини қоллайдиғанлар өткүзгән намайишлар, венезуела һәмдә район нуқтисидин ейтқанда, чоң өзгиришләргә сәвәб болған иди.
өктичиләр үстүнлүкни игиләйдиған дөләт парламенти башлиқи хуән гуайдо намайишта өзини венезуеланиң «вақитлиқ пирезиденти» дәп елан қилди. хуән гуайдониң «вақитлиқ пирезидентлиқи» ни, америка, канада, коломбийә, перу, екватор, парагвай, биразилийә, чили, панама, аргентина, костарика вә гиватемала қатарлиқ дөләтләр етирап қилди.
мадуро каракастики пирезидентлиқ сарийиниң балконидин қоллиғучилириға хитаб қилип, америка билән болған барлиқ мунасивәтләрни үзгәнликлирини вә америка дипломатлириниң 72 саәт ичидә венезуеладин чиқип кетиши керәкликини елан қилған иди.
