engliye bash weziri ikkinchi pilanini élan qildi

türkiye awazi radiyosi xewiri: engliye bash weziri tirésa méy ötken hepte yawropa ittipaqi bilen tüzülgen yawropa ittipaqidin chékinish kélishimi parlaméntta ret qilinghandin kéyin, «ikkinchi pilani» ni élan qildi.

bash wezir tirésa méy parlaméntning töwen palatasida parlamént ezalirigha xitab qilghanda, ötken heptidiki awazgha qoyushtin kéyin, hökümetning yawropa ittipaqidin chékinish qarishining özgirishi kéreklikining otturigha chiqqanliqini bildürdi.

u awazgha qoyushtin kéyin, parlaménttiki partiyelerning mesulliri we parlamént ezaliri bilen körüshkenlikini eskertti we bu körüshüshlerning intayin yaxshi ötkenlikini bildürdi.

u yawropa ittipaqidin kélishimsiz chékinish éhtimalini emeldin qaldurush toghrisidiki teleplerge jawab bérip: «yawropa ittipaqidin kélishimsiz chékinishtin waz kéchishning yoli, parlamént bir kélishimni testiqlishi kérek, hökümet buni meqset qildu» dédi.

u yawropa ittipaqidin kélishimsiz chékinishni tosushning yene bir yolining, yawropa ittipaqidin chékinishni emeldin qaldurush bolidighanliqini bildürüp: «bu, référandumning netijisige qarshi chiqish bolidu we buning közitilishi kérek bolghan yol ikenlikige ishinimen» dédi.

u yawropa ittipaqidin chékinish waqtini kéchiktürüshning mesilini hel qilmaydighanliqini, peqetla kéchiktüridighanliqini ilgiri sürdi we yawropa ittipaqiningmu bu yolni qollash éhtimalining intayin az bolghanliqini qeyt qildi.

bash wezir tirésa méy yéngi référandum ötküzüsh telepliri üstidimu toxtaldi. u mundaq dédi:

«wezipimiz birinchi référandumning netijisini emelge ashurush. ikkinchisining qilinishi, bu dölette référandumlarni qandaq ötküzgenlikimiz heqqide chong mesililerni keltürüp chiqiridu. bolupmu, engliyeni parchilashqa urunuwatqanlarning qolini téximu küchlendüridu. yéngi référandumning yawropa ittipaqidin chékinish waqtini kéchiktüridu. bu ehwalda, engliye may éyida ötküzülidighan yawropa parlaménti saylamlirigha qatnishishqa mejbur qalidu.»

bash wezir tirésa méy hökümetning yawropa ittipaqidin chékinish kélishimidiki «tedbir maddisi» kirizisini hel qilish üchün «bélfast» (Belfast) kélishimini özgertidighanliqi heqqide chiqqan gep-sözlerning yalghan ikenlikini bildürdi.

u hökümetning yawropa ittipaqi bilen bundin kéyinki uchrishishlirida, shotlandiye, gallér we shimaliy irélandiye wekilliri bilen téximu köp körüshüshke ehmiyet béridighanliqini qeyt qildi.

u yawropa ittipaqidin kélishimsiz chékinish emelge ashqanda, engliyede yashaydighan yawropa ittipaqi puqralirining engliyediki heq-hoquqlirining qoghdilidighanliqini eskertip, menggülük olturaqlishish resmiyetliri üchün belgilengen 65 fondstérlingliq heqningmu emeldin qaldurulidighanliqini bildürdi.

u bundin kéyin parlaméntta élip bérilidighan ishlar heqqide toxtalghanda, parlaméntqa bir teklip sunidighanliqlirini we 29-yanwar awazgha qoyulidighanliqini sözlirige ilawe qildi.