riyadning arakanliq musulmanlarni bangladéshqa yolgha séliwétishni pilanlawatqanliqi ilgiri sürüldi

türkiye awazi radiyosi xewiri: eljezire qanilining xewer qilishiche, erkin rohingya ittipaqining seperwerlik ishliri kordinatori nay san lwin, seudi erebistanning 250 arakanliq musulman erni bangladéshqa yolgha séliwétishni pilanlawatqanliqini uqturghan.

seudi erebistandiki arakanliq musulmanlarning köpinchisining waqitliq olturaqlishish ijazitige ige ikenlikige isharet qilghan nay san lwin, yene bir tereptin, jidde shehiridiki shumasi merkizide tutup turuluwatqanlargha jinayetchilerge oxshash muamile qiliniwanliqini bildürdi.

nay san lwin, bu kishiler bangladéshqa yolgha séliwétilgen teqdirde, türmige solinish éhtimali barliqini eskertip, seudi erebistanliq emeldarlarni bu pilandin waz kéchishke chaqirdi.

u, tünügün jidde ayrodurumigha élip méngish aldidiki arakanliq musulmanlarning sin körünüshlirinimu ortaqlashti.

seudi erebistan, 2011 – yilidin kéyin erebistangha kelgen arakanliq musulmanlargha iqamet bérish tüzümini yolgha qoyghanidi.

erkin rohingya ittipaqining seperwerlik ishliri kordinatori nay san lwin, köp sanda kishilik hoquq teshkilatining yéqinqi 2 yilning mabeynide seudi erebistanliq emeldarlargha, arakanliqlargha iqamet bérish toghrisida chaqiriq qilghanliqini, öziningmu bu mesile toghrisida seudi erebistan dairiliri bilen biwasite körüshkenlikini sözlirige ilawe qildi.

birleshken döletler teshkilati (b d t) ning bildürüshiche, 2017 – yili 25 – awghusttin kéyin arakandiki bésim we zulumdin qéchip bangladéshqa kelgenler sani 725 minggha yetken.

b d t  we xelqara kishilik hoquq teshkilatliri, arakanliq musulmanlargha yürgüzülgen zorawanliqqa «irqiy tazilash» yaki «irqiy qirghinchiliq» dep baha bermekte.

 kishilik hoquq teshkilatliri, arakanliq musulmanlarning zörür bolghan bixeter muhit yaritilmay turup birmagha ewetiwétilishining yéngi bir étnik tazilash dolqunini keltürüp chiqirishidin endishe qiliwatqanliqini qeyt qilishmaqta.