jéfriy: p y d térrorluq teshkilati p k k ning dawami, biraq uni térrorluq teshkilati dep qarimaymiz

türkiye awazi radiyosi xewiri: amérika qoshma ishtatlirining süriye alahide wekili bash elchi jéyms jéfréy, washington süriyede hemkarlishiwatqan p y d ning, bölgünchi térrorluq teshkilati p k k ning süriyediki dawami ikenlikini, biraq uni «térrorluq teshkilati dep qarimaydighanliqliri» ni bildürdi.

bash elchi jéyms jéfréy, amérikining «Defense One» namliq médiya orginining yilliq mudapie yighinidiki sözi jeryanida, amérikining bölgünchi térrorluq teshkilati p y d / y p g / p k k bilen bolghan munasiwetliri toghrisida toxtaldi. uning, süriyede hem türkiye, hem p y d / y p g / p k k bilen birla waqitta heriket qilishliri kéreklikige dair sözliri diqqetni tartti.

jéyms jéfréy, türkiyening, süriye démokratik küchliri dégen isimni ishlitiwatqan p y d / y p g ni «p k k ning süriye qaniti» dep qaraydighanliqi, bundaq ehwalda hem türkiye bilen, hem teshkilat bilen birla waqitta hemkarlishishni qandaq tengpunglashturidighanliqliri toghrisida bir soalgha «bu nahayiti qiyin (ish). chünki, türkiyening aktip ishtiraki, hemkarliqi we kordinatsiyesi bolmighan bolsa idi, süriyede nöwette qilghan ishlirimizning héchbirini qilalmighan bolattuq, shuning bilen birge, bir mehelliy shérik bolmay turupmu döletning shimalida mewjutluqimizni we téxi tügimigen daéshqa qarshi küreshni dawamlashturalmighan bolattuq. bu yerlik shérik, 2014 – yilidin buyan p k k ning süriyediki dawami bolghan, biraq biz p k k gha oxshash térrorluq teshkilati, dep qarimaydighan p y d dur. bu mesile türklerge nisbeten küchlük endishe peyda qilmaqta, lékin hazirghiche (térrorluq teshkilati, dep étirap) qilmiduq» dep jawab berdi.

daéshning meghlub qilinishi türkiyeningmu xewpsizlik jehette aldinqi pilandiki ishlirining biri bolghachqa, enqerening amérika bilen y p g / p k k arisidiki munasiwetni (mejburiy) kötürüp kéliwatqanliqini ilgiri sürgen jéyms jéfréy, «süriyede daéshning meghlub qilinishidin bashqa bir siyasitimizning bolushigha qarar qilghan chéghimizda, türkler bizge qiyinchiliq tughdurushqa bashlidi» dédi.

türkiyening, amérika qoshma ishtatlirining aldinqi pilandiki ishlrining biri bolghan daéshning meghlub qilinishi, iran we iran himayisidiki militaristlarning süriyedin chiqiriwétilishi we süriyede siyasiy tinchliq musapisining bashlinishi qatarliqlargha qoshilidighanliqini bildürgen jéfriy, sözini dawamlashturup, «biraq, bizning sherqiy shimalda turup qélishimizning sewebining bu yaki emeslikige ishench qilalmaywatidu. ulargha chüshendürginimizdek buning (y p g / p k k bilen hemkarliq ornitishning) waqitliq bir soda – sétiq ikenlikini dégeniduq. hazirmu shundaq, biraq buninggha bezi shertlerni ilawe qilduq. buni türklerge chüshendürüshke muweppeq bolalmiduq. bu, biz bilen türkler we p y d / s d g arisida chégra rayonida soghuqchiliq peyda bolushigha seweb bolmaqta» dédi.

jéyms jéfréy, süriye alahide wekillikige teyinlinishtin ilgiriki bir qatar yighinlarda, y p g we p y d ning «p k k ning süriyediki dawami ikenliki» ni ochuq – ashkara halda otturigha qoyghanidi. biraq, yéqindin buyanqi sözliride uslub özgertip, y p g ning «amérika qoshma ishtatliri teripidin térrorluq teshkilati dep qaralmaydighanliqi» ni otturigha qoyush arqiliq detalashlarning otturigha chiqishigha seweb bolghanidi.