ھىندونېزىيەنىڭ سۇلاۋېسى ئارىلىدىكى سوپۇتان يانار تېغى پارتلىدى

تۈركىيە ئاۋازى رادىيوسى خەۋىرى: كيودو خەۋەر ئاگېنتلىقىنىڭ ھىندونېزىيەنىڭ ۋولقانولوگىيە ۋە گېئولوگىيەلىك ئاپەتنى ئازايتىش مەركىزىنى مەنبە قىلىپ بەرگەن خەۋىرىگە ئاساسلانغاندا، دېڭىز يۈزىدىن 1800 مېتىر ئېگىزلىكتىكى سوپۇتان يانار تېغى شۇ جاي ۋاقتى سائەت 08:47 مىنۇت ئۆتكەندە پارتلىغان.

سوپۇتان يانار تېغىدىن ئېتىلىپ چىققان كۈل ۋە تۇماننىڭ 4 كىلومېتىر ئېگىزلىككىچە ئۆرلىگەنلىكى ئەسكەرتىلدى. بىلدۈرۈلىشىچە، پارتلاشتا ئادەم ئۆلۈش ۋەقەسىنىڭ مەيدانغا كەلگەن ياكى كەلمىگەنلىكى ھازىرچە ئېنىق ئەمەس ئىكەن.

ھىندونېزىيەنىڭ سۇلاۋېسى ئارىلىسىدا 28 – سېنتەبىردە مەيدانغا كەلگەن يەر تەۋرەش ۋە ئارقىسىدىن يۈز بەرگەن دېڭىز تاشقىنىدا 1347 ئادەمنىڭ قازا قىلغانلىقى بىلدۈرۈلگەنىدى.