pelestin: amérika terep bilen körüshüshni pütünley toxtattuq
pelestin tashqi ishlar ministiri riyad elmaliki, «amérika dairiliri, pelestin xelqige we dewasigha urush élan qildi. shunga amérika qoshma ishtatliri bilen uchrishish ötküzüshni pütünley toxtattuq» dédi.
türkiye awazi radiyosi xewiri: pelestin tashqi ishlar ministiri riyad elmaliki, amérika qoshma ishtatliri israiliyediki elchixanisini tél awiwdin qudusqa yötkeshni qarar qilghan 2017 – yili 6 – dékabirdin buyan pelestin terept in héchbir amérikiliq emeldar bilen körüshmigenlikini bildürdi.
érlandiyede dölet ishliri ziyaritide bolghan pelestin tashqi ishlar ministiri riyad elmaliki, érlandiyelik mensepdéshi simon kowénéy bilen paytext dublinda ötküzgen qoshma muxbirlarni kütüwélish yighinida söz qilip, «amérika dairiliri, pelestin xelqige we dewasigha urush élan qildi. shunga amérika qoshma ishtatliri bilen uchrishish ötküzüshni pütünley toxtattuq» dédi.
maliki, washingtonning tinchliq musapisidiki muresseleshtürgüchilik rolini yoqitip qoyghanliqini tilgha élip, «amérika qoshma ishtatliri hökümitining mezkur qararigha naraziliq bildürüsh üchün herxil xelqaraliq teshkilatlargha erz sunushni qarar qilduq. bu siyasiy we diplomatik uslubni saqlap qalghan asasta pelestin dewasini dawamlashturimiz» dégenlerni qeyt qildi.
pelestin dölet reisi mehmud abbasmu érlandiyediki dölet ishliri ziyariti jeryanida dublinda pirézidént mayékl d.higgins bilen uchriship, pelestin mesilisi we rayondiki özgirishler toghrisida sözleshkenidi.
yawropa ziyariti dairiside érlandiye barghan mehmud abbasqa tashqi ishlar ministiri riyad elmalikidin bashqa pelestin azadliq teshkilati ijraiye kéngishi bash katipi saib ureyqat, bash ministir yardemchisi ziyad ebu ömer we diplomatik ishlargha mesul meslihetchi mejdi elxalidiy qatarliqlar hemrah bolmaqta.
