amérika rusiyeni b d t ning shimaliy koréye émbargolirigha xilapliq qilish bilen eyiblidi

türkiye awazi radiyosi xewiri: amérika qoshma ishtatlirining birleshken döletler teshkilati (b d t) da turushluq daimiy wekili nikki héléy, rusiyeni b d t ning shimaliy koréyege yürgüzgen émbargolirigha «sistémiliq halda xilapliq qilish» we «xilapliq qilish qilmishlirini yoshurush» bilen eyiblidi.

b d t  xewpsizlik kéngishi, b d t ning shimaliy koréyege yürgüzüwatqan émbargolirigha xilapliq qilinghanliqini ilgiri sürgen amérikining telipige asasen yighin chaqirdi.

shimaliy koréyege yürgüzülüwatqan émbargolarni yumshitishni telep qilghan rusiyeni qattiq eyibligen nikki héléy, «shimaliy koréye émbargolirini 11 qétim qollighan rusiye, emdi némishqa yaltiyidu? jawabini bilimiz, chünki rusiye hiyle ishletmekte we tutulup qaldi. bir qétimla emes, rusiyening xilapliq qilmishliri sistémiliq» dédi.

rusiyeni meyli özining bolsun, meyli bashqa döletlerning xilapliq qilish qilmishlirini bolsun, yoshurush bilen eyibligen héléy, «amérika qoshma ishtatlirining qolida rusiyening émbargolargha izchil xilapliq qilip kelgenlikige dair pakit bar» dégenlerni qeyt qildi.

b d t émbargolirigha qarimay, rusiye néfit paraxotliridin bu yil kem dégende 148 qétim shimaliy koréye paraxotlirigha qanunsiz rewishte néfit mehsulatliri yötkelgenlikini, shimaliy koréyening bu yilning deslepki 8 éyida 800 ming waril néfit tapshurup alghanliqini ilgiri sürgen héléy, sözini dawamlashturup, «rusiyening yolsizliqi baktériyege oxshash bolup, shimaliy koréyening yadro qoralsizlinishi yolidiki tirishchanliqlirimizgha tosqunluq peyda qilmaqta» dédi.

u téximu ilgiriligen halda, rusiyeni shimaliy koréye émbargolirini nazaret qilidighan musteqil mutexessisler teyyarlighan doklatqa özgertish kirgüzülüshi üchün, heyetke bésim ishlitish bilen eyiblidi.

rusiyening b d t da turushluq daimiy wekili wassiliy nébénzia bolsa, kéngeshte söz qilip, amérikiliq mensepdéshi nikki héléyning rusiyening shimaliy koréye émbargolirigha xilapliq qilghanliqi toghrisidiki eyibleshlirini ret qildi.

rusiyening shimaliy koréye émbargolirini nazaret qilidighan musteqil mutexessisler teyyarlighan doklatqa özgertish kirgüzülüshi üchün heyetke bésim ishletkenliki toghrisidiki eyibleshlernimu ret qilghan we amérikidin doklat toghrisida téximu etrapliq melumat telep qilghan bolushlirigha qarimay, teleplirining jawabsiz qalghanliqini eskertken wassiliy nébénzia, «kim xelqara jemiyetni aldashqa we hiyle ishlitishke tirishmaqta? doklatni teyyarlighan mutexessisler washington pikirining esiri» dédi.

amérikining shimaliy koréyening yadro qoraliszlinishini qolgha keltürüsh meqsitide pyongyang bilen élip bériwatqan ikki terep söhbetliri toghrisidimu toxtalghan wassiliy nébénzia, «shimaliy koréyedin yadro qoralsizlinish bedilige bosh wedilerni qobul qilishi telep qilinmaqta. söhbet musapisi ikki yönilishlik bir kocha. telepliringiz orundalghinida héchbir nerse bermisingiz, bu kélishimni hasil qilishingiz mumkin emes. émbargolar diplomatiyening ornini basalmaydu» dégenlerni sözlirige ilawe qildi.

xitayning b d t diki wekili ma  bolsa, bashqurulidighan bomba sinaqlirini toxtitip amérika qoshma ishtatliri bilen diyalog ornatqan shimaliy koréyege yürgüzülüwatqan émbargolarning yenggillitishi toghrisidiki telepni qollaydighanliqini bildürdi.