ruhanining trampning 8 qétimliq körüshüsh telipini ret qilghanliqi ilgiri sürüldi
iran pirézidéntliq mehkime ishxanisining bashliqi mehmud waizi, amérika qoshma ishtatliri pirézidénti donald trampning 8 qétim pirézidént hesen ruhani bilen körüshüshni telep qilghanliqini, biraq teleplerning ret qilinghanliqini uqturdi.
türkiye awazi radiyosi xewiri: mehmud waizi, paytext téhranda ötküzülgen ichki kabinét yighinidin ilgiri muxbirlarning soallirigha jawab bérip, ruhanining iqtisadqa mesul xadimlarni asas qilghan halda ichki kabinétqa özgertish kirgüzüshke teyyarliniwatqanliqini éytti.
u qanche ministirning almishidighanliqining téxi éniq emeslikini bildürüp: «pirézidént ichki kabinétqa özgertish kirgüzüsh üchün her sahe zatlar üstide oylanmaqta» dédi we sözini dawamlashturup, «bir qanche ministir almishidu. bu almishish toghrisida pirézidént bayanat béridu. bu özgirishlerning biri hökümetning iqtisadqa mesul qatlimi bolidu» dégenlerni qeyt qildi.
mehmud waizi amérikining iran siyasiyiti toghrisida toxtilip, dölitining washington dairiliri bilen söhbet ötküzüsh niyitining yoqluqini eskertti.
u buningdin ilgiri amérika terepning uchrishish ötküzüshni telep qilghanliqini bayan qilip: «pirézidént ruhani b d t omumiy kéngishi yighinigha ishtirak qilish üchün nyu yorkqa barghanda tramp ruhanidin 8 qétim uchrishishni telep qildi, lékin, ruhani bu teleplerni qobul qilmidi» dédi.
