jumhur reis erdoghan: islam dunyasi we insaniyet muhim sinaqtin ötelmidi
jumhur reis rejep tayyip erdoghan quddus mesiliside peqet islam dunyasiningla emes, pütkül insaniyetningmu muhim sinaqtin ötelmigenlikini éytti.
türkiye awazi radiyosi xewiri: jumhur reis erdoghan türkiye ixtiyariy teshkillengüchiler fondi jemiyitining bashchiliqida pelestin xelqini qollash meqsitide istanbulning yenikapi rayonida ötküzülgen we 500 mingdin artuq kishi qatnashqan «zulumgha lenet, quddusqa yardem» yighilishida qilghan sözide, insaniyetning we musulmanlarning shan – sheripini qoghdash wezipisini öz üstige alghan pelestin xelqige köptin- köp rehmet éytidighanliqi hem minnidetdarliq bildüridighanliqini eskertish bilen bir waqitta, quddusning peqet bir sheherla emes, bir simwol, bir sinaq we bir qible ikenlikini tekitlep mundaq dédi: «tunji qiblimizni qoghdiyalmisaq, axirqi qiblimizning kélechikinimu kapalet astigha alalmaymiz. ochuqraq qilip éytqanda, quddus mesiliside islam dunyasi muhim sinaqtin ötelmidi. bashqiche éytqanda, peqet islam dunyasisila emes, pütkül insaniyetmu halqiliq sinaqtin ötelmidi.»
1967 – yili quddusning ishghal qilinishigha süküt qilghan birleshken döletler teshkilatining, israiliyening adaletsiz, qanunsiz, wijdansiz, exlaqsiz barliq qilmishliri hem zorawanliqlirigha qarap turush arqiliq bundaq chékidin ashqan zulum – sitemlerge wasitilik halda shérik boluwatqanliqini tekitligen jumhur reis erdoghan mundaq dep körsetti: «némishqa dawamliq <dunya beshtinmu chong> deymen, bilemsiler? chünki, birla amérikining ikki kalpukining arisigha mehkum qilinghan dunyada zulumdin bashqa bir nersini körelmeysiler.»
israiliyening 1947 – yildin buyan xalighiniche heriket qiliwatqanliqini, bügünki kündimu oxshashla perwasizlarche yolini dawamlashturuwatqanliqini qeyt qilghan jumhur reis erdoghan, bu heqiqetlerge köz yumushqa zadi bolmaydighanliqini, derweqe, amérika qoshma ishtatlirining tél awiwdiki bash elchixanisini quddusqa yötkesh arqiliq quddusning mehremiyitige yene bir qétim qol tegküzgenlikini tekitlep mundaq dédi: «mesjidi eqsa radikal siyonistlarning tömür tapini astida barghanséri meynetliship kétiwatidu, elxelil jamesi hazirmu ishghaliyet astida bolup, biz musulmanlarning eyibleshtin bashqa ish qolimizdin kelmeywatidu, zulumgha qarshi chiqalmaywatimiz.»
jumhur reis erdoghan türkiyening hem diplomatik qanallirini heriketke keltürüsh hem ijabiy qedemlerni tashlash arqiliq quddus we pelestin mesiliside keskin pozitsiye tutuwatqan birdin - bir dölet ikenlikinimu sözlirige ilawe qildi.
