amérikining yéngi tashqi ishlar ministirining kim jongun bilen mexpiy körüshkenliki ilgiri sürüldi
washington pochtisi géziti amérikining yéngi tashqi ishlar ministiri mayk pompéyoning piyongyanggha bérip kim jongun bilen körüshkenlikini ilgiri sürdi.
türkiye awazi radiyosi xewiri: amérika tashqi ishlar minsitiri mayk pompiyoning (Mike Pompeo) mushu ayning tunji yekshenbe künide shimaliy koréye pirézidénti kim jongun bilen körüshüsh üchün piyongyanggha barghanliqi ilgiri sürüldi.
amérika pirézidénti donald tramp shimaliy koréye pirézidénti kim jongun bilen amérika hökümitidin yuqiri derijilik emeldarlardin birining körüshkenlikini bildürüshidin kéyin, washington pochta géziti piyongyanggha bérip shimaliy koréye pirézidénti bilen körüshken shexsning ismini ashkarilidi.
gézit, tashqi ishlar ministirliqigha tramp teripidin yéngidin teyinlengen mayk pompéyoning merkiziy istixbarat idarisi (CIA)ning bashliqliq wezipisini ötewatqan mezgilde pasxalya bayrimida piyongyanggha barghanliqini ilgiri sürdi.
merkiziy istixbarat idarisi bilen aqsaray dairiliri hazirghiche bu heqte bayanat élan qilmighan bolsimu, washington pochtisi géziti amérikiliq ikki emeldarning melumatini asas qilip bergen xewiride, piyongyanggha bérip kim jongun bilen körüshken amérikiliq emeldarning del mayk pompéyo ikenlikini uqturdi.
2000-yili madéléyin albrayit amérikining tashqi ishlar ministiri waqtida kim jongunning dadisi kim jongil bilen körüshkenidi. shuningdin kéyin, amérika bilen shimaliy koréye arisida yuqiri sewiyelik uchrishishlar bolmighanidi.
pirézidént tramp yaponiye bash ministiri shinzu abé bilen floridadiki pirézidéntliq ishxanisida qoshma axbarat élan qilish yighini ötküzüp, shimaliy koréye pirézidénti kim jongun bilen körüshüshni «töt köz bilen kütüwatqanliqini» bildürgenidi.
bu yil iyunda élip bérilishi pilanliwatqan uchrishishning qaysi yerde bolidighanliqi toghrisida éniq qarar bérilmigenlikini éytqan tramp yene «biwaste we yuqiri sewiyelik»uchrishishlarni élip bérishqa bashlighanliqlirinimu uqturghanidi.
