ئىسرائىلىيە ئەسكەرلىرى قۇددۇستا يەنە قان تۆكتى

تۈركىيە ئاۋازى رادىيوسى خەۋىرى: ئىسرائىلىيە ئەسكەرلىرى تۈنۈگۈن غەززە ۋە ئىيوردان دەرياسىنىڭ غەربىي قىرغىقىدا ئامېرىكا قوشما ئىشتاتلىرىنىڭ قۇددۇسنى ئىسرائىلىيەنىڭ پايتەختى دەپ ئېتىراپ قىلىش قارارىغا قارشى ئۆتكۈزۈلگەن نامايىشلارغا مۇداخىلە قىلدى، بۇ جەرياندا 2 پەلەسىتنلىك شېھىت بولدى، 3 ى ئېغىر 141 ى يارىلاندى.

ئىگىلىنىشىچە، يارىلانغانلار ئارىسىدا ئانادولۇ ئاگېنتلىقىنىڭ فوتو سۈرەت مۇخبىرى مۇستافا ھاسسۇنەمۇ بار ئىكەن. يەنە بىر تەرەپتىن، ئىسرائىلىيە ئەسكەرلىرى راماللاھ ۋە ئەلبىرە شەھەرلىرىنىڭ كىرىشىدە يۈز بەرگەن ۋەقەلەر جەريانىدا بىر پەلەسىتنلىكنى قولغا ئالغان.