tramp kongredin köchmenlik siyasitini emeldin qaldurushni chaqiriq qildi

türkiye awazi radiyosi xewiri: amérika pirézidénti donald tramp niyu yorktiki aptobus békitige qilinghan bomba hujumining gumandari aqayid ullahning amérikagha ailisi bilen köchmenlik wizisi élip kelgenlikini eskertip, kongredin bu wiza siyasitini tüzitish kirgüzüshni telep qildi.

aqsarayning bu heqtiki bayanatida, donald trampning niyu yorktiki bomba hujumi toghrisida qilghan sözige orun ajritildi. bayanatqa asaslanghanda, donald tramp: «pirézidéntliqqa namzat bolghan tunji künümdin étibaren köchmenlik siyasitining tüzitilishi kéreklikini dep kéliwatimen. térrorluq jinayiti gumandari milliy bixeterlikimizge uyghun bolmighan aile köchmenlik wizisi bilen dölitimizge kelgen» dédi.

tramp hazirqi siyaset bilen dölitimizge kelgen nurghun köchmenning yéterlik derijide bixeterlik tekshürüshtin ötküzülmigenlikini ilgiri sürüp, bezi döletlerge qarita yürgüzgen wiza cheklimisini misal qilip körsetti we höküitining qattiq bixeterlik tedbirlirini yolgha qoyghanliqlirini qeyt qildi.

«kongre köchmenlik zenjirini axirlashturushi kérek» dégen pirézidént donald tramp, aile ezaliri ichide amérika puqralirining birinchi derijilik aile ezalirigha köchmen bolush hoquqigha érishishige imkaniyet yaritip bergen wiza siyasitini emeldin qaldurushni telep qildi.

u térrorluq jinayetlirige chétilip qalghan kishilerge qanun yol qoyghan dairede eng éghir jaza bérilishini telep qidi. u: «ölüm jazasini öz ichige alghan eng éghir jazalarni bérilishi kérek» dédi.

niyu york saqchi dairiliri tünügünki hujumda gumandarning özini qoshqanda töt kishining yarilinishini keltürüp chiqarghan aqayid ullahning 2011-yili amérikagha aile köchmen wizisi bilen kelgenlikini we yette yildin buyan niyu yorkning bruklin rayonida turghanliqini élan qilghan idi.