shinzu abi: tramp biz ishineleydighan rehber iken

türkiye awazi radiyosi xewiri: yaponiye kyodo agéntliqi bash wezir shinzu abining péruda ötküzülidighan asiya-tinch okyan iqtisad birliki (APEC) yighinigha qatnishishtin burun amérikini ziyaret qilip, donald tramp bilen körüshkenlikini xewer qildi.

bash wezir shinzu abi tramp bilen körüshkendin kéyin élan qilghan bayanatida, yaponiye bilen amérika otturisidiki özara ishench méxanizmi üstige qurulghan munasiwetlerni tekitlep: «tramp bilen ötküzülgen ayrim uchrishishimiz heqqide tepsiliy melumat bérelmeymen. emma, ikki dölet munasiwiti özara ishenchke tayinidu. döletler arisida özara ishench bolmisa, munasiwetler ilgirilimeydu. trampning, biz ishineleydighan rehber ikenlikige qayil boldum. biz yene muwapiq bir waqitta körüshimiz» dédi.

donald tramp feyisbuk arqiliq: «bash wezir shinzu abi öyümge keldi, dost bolup qalduq, buningdin memnunluq hés qildim» dégen uchurini hembehirleshti.

shundaq qilip, bash wezir shinzu abi téxi wezipisini tapshuruwalmighan amérika pirézidénti bilen körüshken tunji chet el rehbiri bolup qaldi.

bu jeryanda, hemmining diqqiti trampning amérikini öz ichige alghan 12 dölet imzalighan trans-tinch okyan shériklik kélishimige qandaq pozitsiye tutidighanliqigha merkezleshti.

tramp saylam mezgilide «hemmidin awal amérika» dégen shoarni tekitlep, ikki aydin kéyin wezipisini ötküzüp béridighan pirézidént obama imzalighan TPP kélishimidin chékinip chiqidighanliqini bildürgen idi.

amérika kéngesh palatasi hazirche TPP kélishimini imzalimidi.