Numan Kurtulmuş: "Ysraýylyň Gazadaky hüjümleri aç-açan genosid" diýdi

Türkiyäniň Beýik Millet Mejlisiniň (TBMM) başlygy Numan Kurtulmuş, bütin adamzadyň tomaşa edýän Ysraýylyň Gaza garşy hüjümleriniň gyrgynçylykdan öte, aç-açan bir genositdigini habar berdi. 

TBMM-nyň başlygy Numan Kurtulmuş, Russiýanyň Ankara şäherindäki Adatdan daşary we doly ygtyýarly ilçisi Alekseý Ýerhowy kabul etdi. 

Numan Kurtulmuş mejlisde geçen duşuşykda Ysraýylyň Gaza garşy adam hukuklarynyň düzgün bozmalaryny özünde jemleýän hüjümlere we sebitde başdan geçirilýän ynsanperwer krizislere ünsleri çekip, ABŞ başda bolmak bilen Günbatar ýurtlarynyň uly böleginiň Ysraýylyň arkasyny tutup, ony goldaýandygyny belledi. 

Hüjümleriň kabul edilmesizdigini aýdan Numan Kurtulmuş, bu wagşyçylygyň jogapkärleriniň halkara kazyýetlerde hökmany ýagdaýda jezalandyryljakdygyna ynanýandyklaryny habar berdi. 

Türkiyäniň we Russiýanyň iň goňşy ýurt hökmünde ençeme ugur boýunça güýçli hyzmatdaşlyga eýedigini aýdan Numan Kurtulmuş, sebitdäki çaknyşyklaryň ýakyn hyzmatdaşlygy mejbur edýändigini nygtady. 

Sebitden daşary aktýorlaryň we döwletleriň meselelere goşulmagynyň çaknyşyklary has hem artdyrjakdygyny aýdan Numan Kurtulmuş, bar bolan meseleleriň, sebitiň ýurtlary tarapyndan gepleşikler arkaly hötdesinden gelmekleriniň iň dogry ýoldugyny beýan etdi. 

Russiýanyň Ankara şäherindäki Adatdan daşary we doly ygtyýarly ilçisi Alekseý Ýerhow hem öz gezeginde Türkiye-Russiýa gatnaşyklaryň ýeten sepgidine kanagatlanma bildirdi, Palestina meselesinde Türkiye bilen şol bir garaýyşa eýediklerini belledi.