Çawuşogly: "Gazagystanyň durnuklylyga, asudalyga we parahatçylyga gowuşmagyny dileýäris" diýdi

Türkiýäniň Daşary işler ministri Mewlüt Çawuşogly Gazagystanyň iň gysga wagtda durnuklylyga, asudalyga we parahatçylyga gowuşmagyny dileýändiklerini belläp: "Şol sebäpli Türkiýe we Türk Döwletleri Guramasy hökmünde her dürli goldaw bermäge taýardyrys" diýip habar berdi. 

Daşary işler ministri Mewlüt Çawuşogly, Antalýada geçirilen Adalat we ösüş partiýasynyň Ankara welaýat bölüminiň geňeşmeler we netijelendirme maslahatyna gatnaşdy. 

Mewlüt Çawuşogly, ol ýerde eden çykyşynda, Türkiýäniň daşary syýasatynda bir dawasynyň bardygyny, her ýerdäki kowumdaşlarynyň we doganlyk halklarynyň aladalaryny öz aladasy hökmünde garaýandyklaryny belläp: "Türk dünýäsiniň gelejegi biziň derdimiz. Gazagystandaky hadysalara aladalanýarys, ýakyndan gözegçilik edýäris. Hormatly Prezidentimiz Türk Döwletleri Guramasynyň döwürleýin başlygy hökmünde Gazagystanyň Prezidenti başda bolmak bilen agza ýurtlaryň Döwlet baştutanlary bilen telefon arkaly gürrüňdeş boldy. Men hen Daşary işler ministrler bilen gürrüňdeş boldym, synçy ýurt bolan Wengriýa bilen birlikde. Sişenbe güni Daşary işler ministrleriniň maslahatyny geçireris. Beýanatlarymyzy Türkiýe we Türk Döwletleri Guramasy bolup berdik" diýip mälim etdi. 

Mewlüt Çawuşogly: "Gazagystanyň iň gysga wagtda durnuklylyga, asudalyga we parahatçylyga gowuşmagyny dileýäris. Şol sebäpli Türkiýe we Türk Döwletleri Guramasy hökmünde her dürli goldaw bermäge taýardyrys. Beýleki agza ýurtlaryň, ýagny Türk Dünýäsiniň aladalary biziň aladalarymyzdyr. Muňa bütin dünýä Garabag söweşinde göz ýetirdi" diýip aýan etdi.