Türkiýäniň Harby Güýçleri Owganystanyň Işini Ýeňilleşdirer

Prezident R.T.Erdogan göni ýaýlymda gün tertibiniň ileri tutulýan ugurlary boýunça soraglara jogap berdi

Erdogan Türkiýäniň Owganystandaky harby güýjünin täze hökümetiň halkara jähtden pozisiýasyny güýçlendirip, işini ýeňilleşdirjekdigini aýtdy.

Erdogan Talibanyň ýolbaşçylaryny kabul etjekdigini ozalam beýan edendigini ýatladyp; “Biz bu pozisiýamyzy dowam etdirýäris. Talibanyň ýolbaşçylarynyň beren parasatly we ünsli beýanatlary bizde-de kanagatlanma döredýär. Biz owgan halkynyň asudalygy, ol ýerde ýaşaýan türki dilli kowumdaşlarymyzyň gelejegi we ýurdumyzyň bähbitleriniň goralmagy üçin ähli hyzmatdaşlyga taýar” diýdi.

Owganystandaky türk harby güýjünin hiç haçan söweşiji bolmandygyny nygtan Erdogan: “Harby güýçlerimizi asla daşary ýurtly güýç hökmünde kabul etmedik, ulanmadyk. Türkiýäniň Owganystandaky harby güýji täze hökümetiň halkara derejesinde pozisiýasyny güýçlendirer we işini ýeňilleşdirer. Indi ýüze çykan täze şertlere görä pozisiýasymyzy kesgitläp, gepleşiklerimizi şoňa laýyklykda dowam etdirýäris” diýdi.

Prezident Erdogan: “Häkimiýetde kimiň bardygyna garamazdan Owganystana ähli şertlerde goldaw bermek wepadarlygyň we doganlygyň talabydyr” diýdi.

Owganystanda ýekşenbe güni Kabuly gabaw astyna alan Taliban, Prezident Aşraf Ganiniň ýurtdan gaçmagyndan we hökümete degişli güýçleriň şäherden gitmeginden soň şäheri doly gözegçiligine alypdy.