Erdoganyň Lukmançylyk baýramy mynasybetli saglygy goraýyş edaralarynyň işgärlerine ýüzlenmesi

Türkiýäniň Prezidenti Rejep Taýýip Erdogan, 14-nji mart Lukmançylyk baýramy mynasybetli saglygy goraýyş edaralarynyň işgärlerine niýetläp ýüzlenme çap etdi. 

Jemgyýetçilik meselelerinde habarlylygy ýokarlandyrmak maksady bilen döredilen "Haýyş Platformasy" tarapyndan koronawirus epidemiýasy zamanynda yhlas bilen zähmet çeken saglygy goraýyş edaralarynyň işgärleri üçin "Dessan ýazanlara hat ýazalyň" şygary bilen ýola goýulan sanly hat kampaniýasynyň ilkinji hatyny Prezident Erdogan ýazdy. 

14-nji mart Lukmançylyk baýramynda başlaýan we aprel aýynyň ahyryna çenli dowam etjek kampaniýanyň çäginde her kim "dijitalmektup.lutfenplatformu.org" saýtynyň üsti bilen saglygy goraýyş edaralarynyň işgärlerine öz duýgularyny we pikirlerini ýetirip bilerler. Sanly hatlar Türkiýede işleýän ähli saglygy goraýyş edalarynyň işgärlerine ýetiriler. 

Prezident Erdogan "Hormatly doganym" sözleri bilen başlan hatynda saglygy goraýyş edaralarynyň işgärlerini 14-nji mart Lukmançylyk baýramlary bilen gutlap: "Size we ähli kärdeşleriňize mileltimize we bütin adamzada eden hyzmatlaryňyz üçin minnetdarlyk bildirýärin" diýip belledi. 

Prezident Erdogan taryhyň dowamynda gerek bolan mahaly öz janlaryny gaýgyrman millete kömek etmek üçin tagalla eden saglygy goraýyş edalarynyň işgärleriniň, koronawirus epidemiýasyna garşy alynyp barylýan aldym-berdimli göreşde öň hatarda durýandyklaryny belläp: "Ençeme hepdeläp öýlerine gidip bilmedik, maşgalaryny gujaklap bilmedik saglygy goraýyş edaralarynyň işgärleri, raýatlarymyzy iň gysga wagtda saglygyna gowuşdyrmak üçin gije-gündiz diýmän işlediler. Türkiýäniň bütin dünýäde nusga görkezilýän koronawirusa garşy göreşde siziň bu pidakärligiňiziň we gaýratyňyzyň uly paýy bar. Şu günki güne çenli 30 müňe golaý adamy bizden goparan koronawirus epidemiýasyna garşy göreşiň entek gutarmandygyny bilýäris. Epidemiýa howpy dolulygyna ortadan aýrylýança çenli bilelikde göreş alyp barmalydyrys" diýip nygtady.  

Prezident Erdogan, soňky asyryň iň uly saglygy goraýyş apatynda millet üçin jany-teni bilen işlän saglygy goraýyş edaralarynyň işgärlerine minnetdarlyk bildirip, epidemiýa garşy göreş tapgyrynda ýogalan saglygy goraýyş edaralarynyň işgärlerine Alladan rehnet, dogan-garyndaşlaryna bolsa sabyr dileýändigini belledi.