Türk metbugatynyň gysgaça mazmuny
Gündelik gazetler ýurduň we dünýäniň gün tertibiniň ileri tutulýan ugurlary bilen bagly habarlara giň orun berýärler.
“Sabah” gazeti “Ministr Güler: “Soňky terrorçy täsirsiz ýagdaýa getirilýänçä göreşe dowam ederis” söz başyly habarynda, Milli goranmak ministri Ýaşar Güleriň düýn beren beýannamasynda; “Ýurdumyzyn asudalygyna we howpsuzlygyna wehim salýan ähli terror guramalaryna garşy soňky terrorçy täsirsiz ýagdaýa getirilýänçä göreşimizi dowam etdireris” diýendigini ýazýar.
“Hürriýet” gazeti “Hakan Fidan: Maňa bildirilen ynama sagbolsun aýdýaryn” söz başyly habarynda, Milli howpsuzlyk gullugynyň başlyklygyndan Daşary işler ministrligine bellenen Hakan Fidanyň düýn wezipäni kabul ediş dabarasynda sözlän sözünde, milli daşary syýasata üns çekip; “Maňa bildirilen ynam üçin sagbolsun aýdýaryn” diýen sözlerini çap edýär.
“Ýeni Şafak” gazeti “İbrahim Kalyn Milli howpsuzlyk gullugynyň başlygy boldy” söz başyly habarynda, Kommunikasiýalar edarasynyň Milli howpsuzlyk gullugynyň Başlyklygyna İbrahim Kalynyň bellenendigini habar berendigini mälim edýär. Berilen beýannamada; “Prezidentimiz R.T.Erdogan Milli howpsuzlyk gullugynyň Başlyklygyna Hormatly İbrahim Kalyny belledi” diýilýär.
“Star” gazeti “Şahbaz Şerif: Biz Türkiýe bilen bir bedende urýan iki ýürek ýaly” söz başyly habarynda, Pakistanyň Premýer-ministri Şahbaz Şerifiň Türkiýe bilen Pakistanyň arasyndaky gatnaşyklar hakynda; “Ýurtlarymyz bir bedende deň urýan ýürek ýaly” diýen sözlerini okyjy köpçüliginiň dykgatyna ýetirýär. Şerif Pakistanyň we Türkiýäniň ýakyn gelejekde söwda gatnaşyklaryny artdyrmak, bio-gaz, gün energiýasy we gidroelektrik pudaklarynda hyzmatdaşlyk üçin ikitaraply ösüşi ýola goýjakdyklaryny aýtdy.
“Haber Türk” gazeti “Maý aýynyň inflýasiýa görkezijileri çap edildi” söz başyly habarynda, maý aýynda ýyllyk inflýasiýanyň 39,54 göterime deň bolandygyny, şeýlelikde 7 aýyň dowamynda ýyllyk inflýasiýanyň durnukly aşaklandygyny ýazýar.
