Türk metbugatynyň gysgaça mazmuny
Ýurduň we dünýäniň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar.
“Haber Türk” gazeti “Uçarmansyz harby uçarymyzy 2023-nji ýylda uçurmagy meýilleşdirýäris” söz başyly habarynda, Prezident R.T.Erdoganyň düýn Adalat we ösüş partiýasynyň Mejlisdäki toparynyň maslahatynda sözlän sözünde: “Uçarmansyz harby uçarymyzy enşalla 2023-nji ýylda uçurmagy meýilleşdirýäris” diýendigini ýazýar.
“Sabah” gazeti “Ministr Çawuşogly Gresiýa sapar eder” söz başyly habarynda, Daşary işler ministri Mewlüt Çawuşoglunyň düýn beren beýannamasynda 31-nji maý ýekşenbe güni Gresiýa sapar gurajakdygyny we saparynyň dowamynda Afyna hem-de Saloniki şäherlerine barjakdygyny aýdandygyny mälim edýär.
“Ýeni Şafak” gazeti “Milli goranmak ministrligi Azerbaýjana 5 sany Mehaniki mina saplaýyş enjamyny berdi” söz başyly habarynda, Milli goranmak ministrliginden düýn berilen beýannamada, ministrligiň “Harby zawodlar we gämi gurluşyk werfi paýdarlar jemgyýetinde” öndürilen 5 sany Mehaniki mina saplaýyş enjamynyň Azerbaýjana gowşurylandygyny mälim edýär.
“Watan” gazeti “Täze “BioNTech” sanjymlary Türkiýä geldi” söz başyly habarynda, Saglygy goraýyş ministri Fahrettin Koja tarapyndan şertnama baglaşylandygy habar berilen 120 million doza “Pfizer-BioNTech” sanjymynyň birinji tapgyrynyň düýn Ankara gelip gowşandygyny okyjy köpçüliginiň dykgatyna ýetirýär. sanjymlar ýörite sowadyjy konteýnerler bilen Saglygy goraýyş ministrliginiň Sanjym we derman ammarlaryna ýerleşdirildi.
“Star” gazeti “Türkiýede öndürildi, 40 ýurda eksport edildi” söz başyly habarynda, 2021-nji ýylyň ýanwar-aprel aýlarynyň aralygynda Türkiýeden Amerika, Germaniýa, Kuweýt we Belgiýanyň başda durmagynda 40 ýurda 9,5 million dollarlyk bal eksport edilendigini ýazýar.
