Türk metbugatynyň gysgaça mazmuny
Ýurduň we dünýäniň gün tertibiniň ileri tutulýan ugurlary bilen bagly habarlar gündelik gazetlerde giň beýan tapýar
“Watan” gazeti “Prezident beýan etdi: 2023-nji ýylda aýa gideris” söz başyly habarynda, Prezident R.T.Erdoganyň düýn paýtagt Ankarada Beştepe Millet maslahatlar we medeniýet merkezinde Kosmos gullugy tarapyndan guralan “Milli kosmos gullugynyň” Tanyşdyryş maslahatyna gatnaşandygyny ýazýar. Gazet Erdoganyň “Milli kosmos Maksatnamasyndaky birinji we iň esasy maksadymyz Respublikamyzyň 100-nji ýylynda (2023) aýa barmak. Enşalla aýa gideris. Taýarlyklaryna başlanan “Aý” maksatnamasy bilen şol maksady iki tapgyrda tamamlamagy meýilleşdirýäris” diýen sözlerini çap edýar.
“Ýeni Şafak” gazeti “Prezidentiň metbugat Sekretary İbrahim Kalyn Makronyň Diplomatiýadan jogapkär Baş geňeşçisi Bonni bilen telefon arkaly söhbetdeş boldy” söz başyly habarynda, Prezidentiň metbugat Sekretary Kalynyň düýn Fransiýanyň Prezidenti Emmanuel Makronyň Diplomatiýadan jogapkär Baş geňeşçisi Emmanuel Bonni bilen telefon arkaly söhbetdeşlik geçirip, özara gatnaşyklar, Türkiýe-ÝB gatnaşyklary, Gündogar Ortaýer deňizi, Ýokary Garabag, Siriýa we Liwiýa meselelerinde pikir alyşandygyny mälim edýär.
“Hürriýet” gazeti “Ömer Çelik Merkezi ýerine ýetirijiler geňeşinden soň beýannama berdi” söz başyly habarynda, Adalat we ösüş partiýasynyň metbugat Sekretary Ömer Çeligiň düýn partiýasynyň Merkezi ýerine ýetirijiler geňeşiniň maslahatyndan soň beren beýannamasynda türk goşunlarynyň Kiprdäki pozisiýasynyň üýtgewsizdigini we işini dowam etdirjekdigini aýdandygyny ýazýar.
“Sabah” gazeti THÝ ýene birinji” söz başyly habarynda, Türk howaýollarynyň Ýewropanyň Aeronawigasiýa howpsyzlygy guramasynyň görkezijilerine görä üstümizdäki aýyň birinji hepdesinde günde ortaça 588 uçuş bilen Ýewropada birinjiligi elden bermändigini, Air Fransyň bolsa günde 381 uçuş bilen 2-nji orny eýeländigini okyjy köpçüliginiň dykgatyna ýetirýär.
“Haber Türk” gazeti “Ýanwar aýynda çaý eksportyndan 1,6 million dollar girdeji” söz başyly habarynda, Türkiýeden ýanwar aýynda 60 ýurda 392 tonna çaý eksport edilip, 1,6 milliondan gowrak girdeji alynandygyny mälim edýär. Çaý eksportunda Belgiýa, Germaniýa we Ysraýyl esasy orny eýeledi.
Degişli Habarlar
Türk metbugatynyň gysgaça mazmuny
Gün tertibiniň ileri tutulýan ugurlary hakyndaky habarlar gündelik gazetlerde giň seslenme döredýär.
