Türk metbugatynyň gysgaça mazmuny 26.02.2016

“Ýeni Şafak" gazeti: “Terrora garşy göreşde täze döwür" söz başyly habarda, Türkiýäniň terrora garşy göreşde täze strategiýa alyp barjakdygyny mälim edýär. Gazet Goranmak ministrliginiň we Baş ştabyň žandarma we polisiýa işgärlerinden daşgary, pyýada goşunyň we ýöriteleşdirilen harby toparlaryň hem şäheriň howpsyzlygyny üpjün etmäge kömek berjekdigini nygtaýar. Habarda çäräniň serhediň Siriýa tarapyndaky PÝD-niň gözegçiligi astyndaky ýerlerden we Demirgazyk Yrakdan geljek howplara garşy alynandygy ýazylýar.

“Haber Türk" gazeti: “Milli howpsyzlykda Kwant kriptografiýa tehnologiýasy zamany" söz başyly habarynda, TÜBITAK-yň başlygy Prof.Dr. Arif Erginiň TBMM-niň Goranmak komissiýasyna maglumat beren wagty milli howpsyzlyk babatynda “Kwant kriptografiýa" tehnologiýasyna geçiljekdigini aýdandygyny habar berýär. Gazet şol çäkde döwlediň strategik taýdan wajyp edaralarynyň arasynda dörediljek “Kwant kriptografiýa" aragatnaşyk liniýalarynyň kömegi bilen maglumatlaryň daşardan alynyp bilinmejekdigini, 3-nji şahys tarapyndan alynan halatynda bolsa öz-özüni ýok etjekdigini belleýär. Habarda döwlet ýolbaşçylarynyň arasyndaky telefon diňlenşiginiň hem mümkin bolmajakdygy beýan edilýär.

“Sabah" gazeti: “Prezident Diwany täzeden üýtgedip gurulýar, Beştepede 5 geňeş dörediler" söz başyly habarynda, 5 sany täze geňeşiň Prezident Diwanyny has işjeň ýagdaýa getirmek maksady bilen dörediljekdigini okyjy köpçüliginiň dykgatyna ýetirýär. Gazet 5 geňeşiň esasy maksadynyň halkyň her gatlagynyň ýurduň meseleleri babatyndaky pikirlerini diňläp, resmileri habardar etmekdigini nygtaýar. Gazet ilkinji dörediljek geňeşiň Ykdysadyýet we daşary söwda geňeşiniň boljakdygyna, 50 agzadan ybarat boljak geňeşiň agzalarynyň arasynda uly kärhanalaryň başlyklarynyň hem boljakdygyna ünsi çekýär.

“Star" gazeti: “Bütindünýä bank: Türkiýe çak edişimizden çalt ösdi" söz başyly habarynda, Bütindünýä bankynyň Türkiýe boýunça jogapkär ýolbaşçysy Ýohannes Zuttyň Türkiýäniň 2015-nji ýyldaky ösüşiniň garaşylandan köp ösendigini aýdandygyny mälim edýär. Gazet Zuttyň: “Geçen ýyl bolan saýlawlaryň, ondan soň bolan syýasy kesgitsizligiň we geosyýasy wakalaryň Türkiýä has erbet täsir ýetirjekdigini çak edýärdik. Emma Türkiýäniň hem döwlet edaralarynda hem-de hususy pudagynda güýçli infrastrukturanyň bardygyna şaýat boldyk" diýendigini ýazýar.

“Hürriýet" gazeti: “Bu ýol Bazele barýar, Fenerbahçe Moskwada isleýänine eýe boldy" söz başyly habarynda, Türkiýäniň Fenerbahçe futbol komandasynyň UEFA Ýewropa ligasynyň 32-nji tapgyrynda Russiýanyň Lokomotiw Moskwa futbol komandasy bilen 1-1 hasaby bilen deňme-deň galandygyny belleýär. Gazet Stambulda bolan ilkinji duşuşykda 2-0 hasaby bilen üstün çykan Fenerbahçeniň bu dereje bilen UEFA Ýewropa ligasynyň indiki tapgyryna geçendigini habar berýär. Habarda Lokomotiw Moskwa komandasyndan üstün çykan Fenerbahçeniň indiki tapgyrdaky garşydaşynyň şu gün 14:00-da çekiljek bijeler arkaly belli boljakdygy beýan edilýär.