Türkmenistanyň Türk Geňeşine Agza Bolmagyny Arzuw Edýäris

Prezident R.T.Erdogan Türkmenistanyň ýakyn geljekde Türk geňeşine agza bolmagyny arzuw edýändiklerini aýtdy

Erdogan Türkmenistanyň hemişelik Bitaraplyk derejesiniň 25 ýyllygy mynasybetli geçirilen maslahata wideo ýüzlenme ugratdy.

Türkmenistanyň hemişelik Bitaraplygynyň 25-nji ýylyny gutlan Erdogan Türkiýäniň Türkmenistanyň garaşsyzlygyny ykrar eden ilkinji ýurt bolmagynyň ýany bilen, hemişelik bitaraplygynyň ykrar edilmegi hakynda 1995-nji we 2015-nji ýyllardaky BMG-niň Baş Assambleýasynyň kararlaryny hem goldandygyny beýan etdi.

Prezident Erdogan Türkmenistanyň bitaraplyk syýasatynyň çäginde halkara parahatçylygynyň, howpsyzlygyň we durnuklylygyň ýola goýulmagy ugrunda BMG we beýleki halkara guramalary bilen alyp barýan işlerini ýakyndan bilýändiklerini hem-de şol ugurdaky hyzmatdaşlygy dowam etdirmekde ygrarlydyklaryny aýtdy.

Hemişelik Bitaraplyk derejesine laýyklykda alynyp barylýan daşary syýasatyň sebitleýin netijeleriniň açyk-aýdyň görülýändigine ünsi çeken Erdogan: “Türkmenistanyň Owganystanda durnukly we birsydyrgyn parahatçylygyň ýola goýulmagyna we Aziýanyň Ýüregi-Stambul tapgyryna bolan goşantlaryna kanagatlanma bildirýäris. Biz Türkmenistanyň hem Orta Aziýa ýurtlarynyň arasyndaky hyzmatdaşlyga hem-de Orta Aziýa ýurtlarynyň halkara döwletler we guramalar bilen alyp barýan gatnaşyklaryna işjeň gatnaşmagyndan hoşal.

Pursatdan peýdalanyp Türkmenistanyň ýakyn geljekde Türk geňeşine agza bolmagyny arzuw edýändigimizi ýene-de bir gezek nygtasym gelýär.

Türkmenistanyň BMG-niň Durnukly ösüş maksatnamasyna laýyklykda ulaglar, energetika, senagat, söwda, saglygy goraýyş we daşky gurşawy goramak ugurlary boýunça edýän nusgawy başlangyçlary diňe bir Türkmenistanyň däl, eýsem sebitiň geljegini şöhlelendirýär. Koronawirus epidemiýasy sebäpli ýüze çykan kynçylyklar Türkmenistanyň başlangyçlarynyň ähmiýetini hasam artdyrýar” diýdi.

Türkiýe bilen Türkmenistanyň arasyndaky doganlyk gatnaşyklarynyň uzyn we düýpli geçmişiniň bardygyny nygtan Erdogan: “Iki taraply sarpa goýmagyň esasynda hyzmatdaşlyk we özara bähbitlilik kadalaryndan ugur alýan bu gatnaşyklar syýasy, söwda we ykdysady, bilim, medeniýet, jemgyýetçilik ugurlarda dowam etdirildi. Şeýle depginli hyzmatdaşlygyň hukuk esasyny emele getirýän ýüzden gowrak ylalaşyga gol çekişildi. Epidemiýanyň ýüze çykaran päsgelçiliklerine garamazdan 2020-nji ýylyň 9 aýynda özara söwda mukdarymyz geçen ýylyň degişli döwrüne görä 18 göterim ýokarlady. Türk firmalary gadyrdan doganym Hormatly Berdimuhamedowyň barşarjaň liderliginde dowam etdirilýän Türkmenistanyň galkynyş syýasatyna goşant goşýar.

Epidemiýanyň azalmagyndan soň Türkmenistan bilen bar bolan hyzmatdaşlyk mehanizmleriniň çägindäki maslahatlary ýaňadandan we ýokary depginde geçirjekdigimize ynanýaryn. Pursatdan peýdalanyp özara gatnaşyklarymyzyň çuňlaşmagyna goldaw berýän Gadyrly Doganym, Döwlet Ýolbaşçysy Hormatly Berdimuhamedowa ýene-de bir gezek sagbolsun aýdýaryn. Hormatly Prezidentiň ady bilen bütin türkmen doganlaryma ýalkymly salamymy ýetirýärin” diýdi.