Azerbaýjana Harby Güýç Ugratmak Hakynda Ygtyýarnama TBMM-niň Garamagyna Hödürlendi

Prezidentiň Diwanynyň Azerbaýjana Harby güýç ugratmak hakyndaky ygtyýarnamasy Türkiýäniň Mejlisiniň garamagyna hödürlendi.

Prezident R.T.Erdoganyň goly bilen ugradylan ygtyýarnamada dost we doganlyk ýurt Azerbaýjanyň basylyp alynan ýerlerinin halas edilmegi ugrundaky göreşiň uzak ýyllardan bäri dowam edýändigini ýatladylýar.

Ygtyýarnamada Ermenistanyň 27-nji sentýabrda Ýokary Garabag front liniýasynda harby we harby däl nyşanalara guran hüjümlerine gaýtawul görkezen Azerbaýjanyň kanuny goranyş hukugyna laýyklykda başladan garşy operasiýasy netijesinde basylyp alynan territoriýalaryny halas etmegi ugrunda uly üstünlik gazanandygy beýan edilýär.

Azerbaýjanyň, Russiýanyň we Ermenistanyň gazanan ylalaşygyna laýyklykda 10-nji noýabrda sagat 00:00-da sebitde hüjümleriň bes edilendigi we basylyp alynan käbir ýerleriň kesgitlenen iş kalendaryna görä Azerbaýjana gaýtarylyp berilmegi hakyndaky maksatnamanyň yglan edilendigine üns çekilýän ygtyýarnamada, gazanylan ylalaşyga laýyklykda ylalaşygyň berjaý edilişine gözegçilik etmek maksady bilen Azerbaýjanyň halas edilen ýerlerinde “Bilelikdäki Merkeziň” dörediljekdigi nygtalýar.

Azerbaýjanyň talabyna laýyklykda Bilelikdäki Merkezde Türkiýäniň we Russiýanyň bilelikde iş alyp barmagyna karar berilendigi nygtalýan ygtyýarnamada, Türkiýe bilen Azerbaýjanyň arasyndaky Strategik hyzmatdaşlyk we özara arkalaşyk etmek hakyndaky ylalaşygyň hökümlerinden gelip çykýan kepillendirmeleri berjaý etmek, hüjümleriň bes edilmegini üpjün etmek, düzgün bozmalaryň öňüni almak, sebitde parahatçylygy we durnuklylygy ýola goýmak, Türkiýäniň ýokary bähbitlerini goramak we goldamak maksady bilen Türk ýaragly güýçleriniň Bilelikdäki Merkeziň wezipeleriniň ýerine ýetirilmegi ugrunda iş alyp barmagy üçin daşary ýurtlara ugradylmagyna bir ýyl möhlet bilen rugsat berilmegini islenýär.