Türkmenistanyň topary Ýakutskide geçirilýän çagalar sport baýramçylygynda

Ýakutskiniň “Tuýmaada” stadionynda “Aziýanyň çagalary” atly VI halkara oýunlarynyň açylyş dabarasy hem-de 32 ýurduň sport toparlarynyň däp bolan ýörişi geçirildi. Olara 12 günüň dowamynda sport bäsleşikleri garaşýar.

Türkmenistanyň topary “Aziýanyň çagalary”  oýunlaryna 2008-nji ýyldan bäri gatnaşýar. Şu ýyl biziň wekiliýetimiziň düzüminde 78 adam bar, olar sportuň 16 görnüşi boýunça ýaryşlarda çykyş ederler.

Geçen gezekki oýunlarda biziň ildeşlerimiz boks görnüşinde (1 kümüş we 2 bürünç medal), erkin göreşde (1 bürünç medal), woleýbolda (ýetginjekler topary üçünji orny eýeledi), dzýudoda (1 kümüş we 1 bürünç medal), samboda (2 kümüş we 2 bürünç medal) hem-de küşt boýunça ýaryşda (1 bürünç medal) üstünlikli çykyş etdiler.

“Aziýanyň çagalary” oýunlary Halkara Olimpiýa komitetiniň hem-de ÝUNESKO-nyň howandarlygynda geçirilýär. Oýunlaryň  şygary: “Sportda dostlukdan—Ýer ýüzünde parahatçylyga!” diýlip atlandyrylýar. (Çeşme: http://www.ashgabat2017.gov.tm/)