ABŞ-da düzediş merkezinde saklanýan ýaş oglanyň öldürilendigi ýüze çykdy
ABŞ-nyň Kanzas ştatyndaky düzediş merkezleriniň birinde saklanýan asly afrikaly ýaş oglanyň, edilen sütemleriň netijesinde ýogalandygy habar berildi
Kanzas ştatynyň Sedgwik raýonyndaky düzediş merkezinde saklanan 17 ýaşyndaky Sedrik Lofton, düzediş merkeziniň işgärleri bilen bolan dawa-jenjelden soň alynyp gidilen hassahanada ýogaldy.
Kazyýet-lukmançylyk edarasynyň resmileri tarapyndan taýarlanan habarnamada, ýaş oglanyň ölüminiň jenaýatdygy habar berildi.
Düzediş merkeziniň resmileri, Sedrik Loftonyň jan-saglygyna zyýan ýetjek ýaralanmalara sezewar bolmandygyny öňe sürüpdiler.
Habarnamada Sedrik Loftonyň garnynyň üstüne ýatyrylyp, elleri baglananyndan soň dem alyşynyň kesilendigi we ýürek uruşynyň durandygy mälim edildi.
Lofton, 24-nji sentýabrda düzediş merkezinde işgärler bilen bolan dawa-jenjelden soň elleri baglanyp birnäçe wagtlap göz tussaglygynda saklanypdy.
Başdan geçirilen dawa-jenjelden soň hassahana ýatyrylan ýaş oglan, 2 gün soň aradan çykypdy.
Loftony ýenjen we şahsyýetleri aýan edilmedik işgärler, tölegli administratiw rugsada çykarylypdylar.