Eýran Asuda Ilatyň Öldürilmegini Ýazgarýar
Eýran, Azerbaýjan bilen Ermenistana ylalaşyga laýyklykda hereket etmekleri üçin çagyryş berdi
Eýranyň Daşary işler ministrliginiň metbugat geňeşçisi Said Hatipzade, Azerbaýjan bilen Ermenistanyň arasyndaky ylalaşygyň basgylanmagyna gynanç bildirýändigini belledi we taraplara ylalaşyga laýyklykda hereket etmekleri üçin çagyryş berdi.
Eýranyň Daşary işler ministrliginiň internet saýtynda berlen ýazmaça beýannamada, Hatipzade, “Eýran, Azerbaýjan bilen Ermenistanyň arasynda soňky çaknyşyklar bilen hüjümleriň bes edilmegi boýunça gazanylan ylalaşygyň basgylanmagyna gynanç bildirýär. Şäherleriň infstrukturalaryny we ilatly ýerlerini raketalar bilen nyşana almakdan ýüz öwürmekleri üçin taraplara çagyryş berýär we asuda ilatyň öldürilmegini ýazgarýar” diýýär.
Resmi Tähranyň hüjümlerde ýogalan asuda ilatyň hossarlaryna gynanç bildirýändigini aýdan Hatipzade, “Eýran, taraplara ylalaşyga laýyklykda hereket etmekleri, halkara hukugyna laýyklykda gepleşikleriň başlamagy, birek-biregiň territorial bitewiligine sarpa goýulmagy we basylyp alynan şäherlerde çekilmegi üçin çagyryş berýär. Resmi Tähran, sebitde yzygiderli parahatçylygyň üpjün edilmegi üçin gepleşiklere goldaw bermäge taýar” diýdi.
Ermenistan bilen Azerbaýjan, Russiýanyň paýtagty Moskwada geçirlen gepleşiklerde 10-njy oktýabrdan ýerli wagt bilen 12.00-dan başlap Daglyk Garabagdaky jesetleriň we ýesirleriň çalşygyny göz öňünde tutýan gumanitar maksatly hüjümleriň bes edilmegi meselesinde ylalaşyk gazanypdy.
Ermenistanyň goşuny ylalaşygyň yzy ýanyndan heniz 24 sagat geçmänkä Azerbaýjanyň Genje şäherine raketalar bilen hüjüm etdi. Hüjümde asuda ilatdan 9 adam ýogalypdy, 34 adam ýaralanypdy.
