Fransiýada Sary ýeňsizlileriň ýurdyň Prezidenti Makrona garşy protestleri dowam edýär

Pariždäki Nation meýdançasynda ýygnanan demonstrantlar, Repablik meýdançasyna çenli ýörediler.

Polisiýa işgärleriniň demonstrantlara garşy gözüňi ýaşardýan gaz ulanan demonstrasiýada 15 adamyň göz tussaglygyna alynandygy mälim edildi.

Aşa çepçi Boýun egmeýän Fransiýa hereketiniň lideri Žan-Lýuk Melenşon, protest ýörüşe gatnaşyp, Sary ýeňsizlilere goldaw berdi.

Demonstrantlaryň Şamp-Ýeliseý köçesinde demonstrasiýa geçirmekleri gadagan edildi. Şol sebäpli Polisiýa gullugynyň işgärleri demonstrantlary, Şarl de Goll-Etual meýdançasynyň töweregindäki köçeler bilen Ýeliseý köşgi we Milli mejlisiň golaýyndan uzakda tutmak üçin giň gerimli howpsyzlyk çärelerini gördi.

Lill, Lion we Tuluza şäherleriniň merkezlerinde demonstrasiýa geçirmek gadagan edildi.

Tuluza şäherinde demonstrasiýa gadagançylygyna garamazdan köçelere çykan demonstrantlar, ulagy ýakdylar.

Polisiýa işgärleriniň gözüňi ýaşardýan gaz ulanan demonstrasiýada 23 adam göz tussaglygyna alyndy we 2 adam agyr ýaralandy.

Tuluzanyň häkimi Žan-Lýuk Mudenk, sosial media hasabyndan beren beýanatynda, demonstrasiýada ulanylan aşa güýje nägilelik bildirdi.

Bordo, Marsel, Strasburg we Monpelýe ýaly şäherlerde hem protestler geçirildi.

Ýurtda geçirilen demonstrasiýalarda Içeri işler ministrliginiň berýän maglumatyna görä, 31 müň adam, Sary ýeňsizlileriň berýän habaryna görä bolsa 80 müň 500 adam gatnaşdy.

Sary ýeňsizlileriň protestleri 2018-nji ýylyň 18-nji noýabryndan bäri dowam edýär.

Hökümet tarapyndan berilen maglumata görä, demonstrasiýalarda häzirki wagta çenli 11 adam ýogaldy, 2 müňden gowrak adam ýaralandy.

Demonstrasiýalarda 8 müň 400 adam göz tussaglygyna alyndy, 1 müňe golaý adam azatlykdan mahrum edildi.