Donald Tramp Demirgazyk Koreýa bilen baglanşykly beýanat berdi
ABŞ-nyň Prezidenti Donald Tramp Koreýa ýarym adasynyň ýadrodan saplanýança çenli Demirgazyk Koreýanyň üstündäki maksimum basyş syýasatynyň dowam etjekdigini beýan etdi
Ak Tam tarapyndan berilen ýazmaça beýanatda Donald Trampyň Günorta Koreýanyň lideri Mun Džein we Ýaponiýanyň Premýer ministri Şinzo Abe bilen aýry-aýry telefon arkaly söhbetdeş bolandygy mälim edildi.
Tramp-Mun telefon söhbetdeşliginde Munyň Demirgazyk Koreýanyň lideri Kim Çen Yn bilen 27-nji aprelde geçiren duşuşygy giňişleýin ýagdaýda ele alyndy.
Telefon söhbetdeşliginde mundan başgada Koreýa ýarym adasynda doly, anyk we yza gaýtmasyz bir ýadro saplanma etabynyň sebite durnuklylyk we asudalyk getirjekdigine ünsler çekildi.
Donald Trampyň Abe bilen geçiren telefon söhbetdeşliginde bolsa Demirgazyk Koreýanyň ýadro we raketa synaglaryny doly ýagdaýda bes etmelidigi bellendi.
Beýleki tarapdan Donald Tramp Demirgazyk Koreýanyň lideri Kim bilen geçirmegi meýilleşdirýän duşuşygynyň 3-4 hepdäniň dowamynda geçirilip bilinjekdigini habar berdi.
Tramp Miçigandaky mitingde eden çykyşynda: “Öňümizdäki 3-4 hepdäniň içinde duşuşyk geçirjekdigimizi pikir edýärin” diýdi.
Munyň örän wajyp bir duşuşyk boljakdygyny aýdan Tramp duşuşykda Koreýa ýarym adasynyň ýadro ýaraglardan saplanmagyny ara alyp maslahatlaşjakdyklaryny habar berdi.
