Gündogar Gutadaky adamzat pajygasy aladalandyrýar

BMG-nyň Adam hukuklary boýunça ýokary komisary Zeýd Raad Al Hüseýin Siriýada Başar Asada tabynlykdaky güýçleriň gabawy astyndaky Gündogar Gutada 4-nji fewraldan bäri guralýan hüjümlerde asuda ilatdan 346 adamyň ýogalandygyny mälim etdi.

Hüjümlerde asuda ilatdan 878 adamyň hem ýaralanandygyny aýdan Hüseýin, hüjümleriň bes edilmegi çagyryşyny berdi.

Hüseýin mesele hakynda beren beýanatynda Gündogar Gutada ýüzmüňlerçe adamyň soňky 5 ýyldan bäri yzygiderli ýagdaýda bombaly hüjümlere sezewar bolýandygyny aýtdy.

Diňe duşenbe güni 13 sagatda 92 adamyň öldürlendigini aýdan Hüseýin, Asada tabynlykdaky güýçleriň we hyzmatdaşlarynyň 4-nji fewraldan bäri yzygiderli ýagdaýda guraýan hüjümleri sebäpli Gündogar Gutada uly pajyganyň başdan geçirilýändigi, ýogalanlaryň we ýaralananlaryň sanynyň barha köpelýändigi barada duýduruş berdi.

Hüseýin Siriýanyň hökümetine we hyzmatdaşlaryna hüjümleriň gyssagly bes edilmegi çagyryşyny berdi, hassalaryň we ýaralananlaryň gyssagly göçürilmelidigine ünsi çekdi.