تورکیه مطبوعاتی اؤزتی 18.11.2016
غرب بو آندا داعشین یانیندا
تورکیه مطبوعاتی اؤزتی 18.11.2016
وطن: "غرب بو آندا داعشین یانیندا"
تورکیه پرزیدنتی رجب طبیب اردوغان دونن پاکیستان پارلامنتینده کئچیریلن میلی مجلیس و سناتو اورتاق ایجلاسیندا دانیشدی. ترورلا موباریزهده غرب اؤلکهلرینین موضعسینی تنقید ائدن پرزیدنت اردوغان، "ترور تشکیلاتلاری قارشیسینداکی همرایلیک و ایش بیرلیگیمیزی یایقینلاشدیراراق داوام ائتدیرمهمیز لازیم اولدوغونا اینانیرام. القاعده و اونون بیر پارچاسی اولاراق اورتایا چیخان داعش کیمی ترور تشکیلاتلاری، مسلمانلارا ضرر وئرن، ایسلاما قارشی حیاتا کئچیریلن ساواشین واسطهسی اولان آلت یاپیلاردیر . غرب بو آندا داعشین یانیندادیر. بونلارین الینده یاخالادیغیمیز سیلاحلارین، غرب گؤکنلی اولدوغونو تثبیت ائتدیک. بوتون بونلار ایسلام دونیاسینا قارشی ائدیلیر "دئدی.
صاباح: "تورکیهدن 20 غرب اؤلکهسینه فتو خبردارلیغی: ماللارا ال قویون پول آخیشینین قطع ائلیین"
تورکیه، فتح اللهچی ترور تشکیلاتینا (فتو) بیر ضربه داها وورماق اوچون دویمنی باسدی. تشکیلاتین آمریکا و آوروپاداکی مال وارلیغینین دوندورولماسی اوچون 20 اؤلکهنی خبردار ائدن تورکیه بو اؤلکهلره آچیلان حسابلار، ترورون فینانسمانینا دستک وئرن، قارا پول پاکلاشدیران تشکیلات و شخصلرین لیستهسینی وئردی. لیستهده یئر آلان ترورو بیرباشا فینانس ائتدیگی سندلشدیریلمیش 400-و آشان شیرکت و اینسانین مال وارلیغی ایله پول آخیشینین دوندورولماسی ایستنیرکن، یئنی دؤورده بو موضوعدا متقابیلیت اساسینین ایشلدیلهجگینه دقت چکیلدی.
حریت: "حکومتدن خاریجی یاتیرمچی حرکتی"
حکومت، ایقتیصاددا جانلانما تامین ائتمه یؤنوندکی خاریجی یاتیرم حرکتینه قالخیر. باش ناظیر بینالی ییلدیریم، خاریجی وطنداشلیق و اوتورما ایجازهسی وئرن قانونی دوزنلمهنین بیر آن اوّل تورکیه بؤیوک میلت مجلیسیندن کئچمهسینی ایستیرکن، آفریقا، سوریه، عراق کیمی اؤلکهلردن تورکیهیه گلن یاتیریمچیلار اوچون خصوصی ایش باشلاددی. ییلدیریم، ویزا پروبلمی یاشایان خاریجی یاتیریملارین پروبلملرینین حلّی اوچون باش ناظیر معاوینی نورالدین جانیکلینین تعلیمات وئردیگینی سؤیلهدی.
خبر تورک: "آنیدین سونرا سیرا گؤبکلی تپهده"
مدنیت و توریزم ناظیرلیگی، موقتی میراث لیستهسینده یئر آلان گؤبکلی تپهنین، (قارصدا) آنی خرابهلریندن سونرا بیرلشمیش میللتلر تشکیلاتینین تحصیل، علم و مدنیت تشکیلاتی (یونسکو) دونیا میراث لیستهسینده یئر آلماسی اوچون ایشلرینی داوام ائتدیریر. ناظیرلیک، گؤبکلی تپهنین نامیزدلیک فایلینی 1 فوریه 2017 تاریخینده دونیا میراث مرکزینه گؤندرهجک. مدنیت و توریزم ناظیری نابی آوجی، دونن (شانلیورفاداکی) گؤبکلی تپهده آراشدیرمالار آپاردی. گؤبکلی تپهنین دونیا آرکولوژی تاریخینین معین پارامترلرینی جدی معنادا سارسیدان بیر قازینتی ساحهسی اولدوغونا دقت چکن ناظیر آوجی، بوراداکی قازینتی اثرلرینین میلاددان اؤنجه 10 مین 500-جی ایله قدر تاریخلندیغینی سؤیلهدی.
یئنی شفق: "حجابا فیبادان ایجازه"
بین الخالق بسکتبال فدراسیونلاری بیرلیگی (فیبا)، 2 آی اوّل باشؤرتوسویله اویناماسینی قاداغان سوئدین هوددینگ تیمینده فورم گئین نوها برهانین، اویونلارا چیخماسینا ایجازه وئردی. قرارین 2017ده ژانویه آیی سونونا قدر اعتبارلی اولاجاغی و فیبا مسئوللارینین موضوعنو گؤروشمک اوچون یئنیدن توپلاناجاغی ایفاده ائدیلدی. سوئد بسکتبال فدراسیونو، کئچن ایل 18 یاشینا گیرمهین برهانین باشؤرتوسویله اویونلارا قاتیلماسینا ایجازه وئرمیش و بو قرارینی فیبایا دا بیلدیرمیشدی. فیبا دا 2 آی اوّل سوئد بسکتبال فدراسیونون آلدیغی قراری لغو ائتمیشدی.
ایلگیلیلی خبرلر
تورکیه مطبوعاتی 13 دسامبر 2019
تورکیه مطبوعاتیندا بو گون درج اولونان بعضی خبرلرین خلاصه سینی تقدیم ائدیریک.