آذربایجان فیلیسطین‌ده دیپلوماتیک نماینده‌لیک آچاجاق
فیلیسطین خاریجی ایشلر باخانی ریاض المالکی، آذربایجان خاریجی ایشلر باخانی جئیحون بایراموو ایله رام‌الله‌داکی باخانلیق مرکزینده بیر آرایا گلدی
فیلیسطین خاریجی ایشلر باخانی ریاض المالکی، آذربایجانین فیلیسطین‌ده دیپلوماتیک نماینده‌لیک آچما قرارین‌دان سئوینج دویدوغونو سؤیله‌دی.
خاریجی ایشلر باخانلیغیندان وئریلن آچیقلامایا گؤره، مالکی، آذربایجان خاریجی ایشلر باخانی جئیحون بایراموو ایله رام‌الله‌داکی باخانلیق مرکزینده بیر آرایا گلدی.
باخانلار گؤروشمه‌ده فیلیسطین تورپاقلارین‌داکی سون گلیشمه‌لر ایله اسرائیلین پوزونتولارینی اله آلدی.
بایراموو، بورادا ائتدیگی دانیشمادا، آذربایجانین ایکی دؤولتلی حل سئچه‌نه‌گینی و باشکندی دوغو قدس اولان بیر فیلیسطین دؤولتینین قورولماسینی دستکله‌دیگینی ایفاده ائتدی.
آیریجا بایراموو، آذربایجانین فیلیسطین‌ده ایل ایچریسین‌ده بیر دیپلوماتیک نماینده‌لیک آچاجاغینی سؤیله‌دی.
فیلیسطین‌لی باخان مالکی ایسه، "اسرائیل، آپارتاید رژیمی و عرقچیلیغا دایالی موستملکه‌چی، یئرله‌شیمچی ایشغال پروژه‌سینی داوام ائتدیریر" دئدی.
بایرامووون دیپلوماتیک نوماینده‌لیگین آچیلیشی اوچون ائدجگی سفری گؤزله‌دیگینی ایفاده ائد‌ن مالکی، "بو قرار آذربایجان جمهوریتی ایله مدنیت، توریزم، تحصیل، علمی آراشدیرما و قالخینما کیمی بیر چوخ ساحه‌ده امکداشلیغی آرتیرماقدا و ایکی اؤلکه آراسینداکی ایلیشکیلرین اورتاق چیخار ساحه‌لرین‌ده گوجلندیریلمه‌سینه قاتقی تامین ائتمکده‌دیر" دئدی.
ایکی اؤلکه آراسینداکی یاخشی ایلیشکیلره توخونان مالکی، دیپلوماتیک نوماینده‌لیگین ائلچیلیک سویه‌سینه یوکسلدیلمه‌سینی اومود ائتدیگینی ده قید ائتدی.
ایلگیلی‌لی خبرلر
آذربایجان جمهوریتیندن رئیسی اوچون باش‌ساغلیغی
آذربایجان جمهورباشقانی ایلهام علییئو، ایران دینی لیدئری علی حامنه‌اییه باش‌ساغلیغی مئساژی گؤندردی
