قوزئی قیبریسدا آذربایجان مدنیت مرکزی آچیلدی
قوزئی قیبریس تۆرک جمهوریتینده آذربایجان-قیبریس دوستلوق جمعیتی طرفیندن لاپتا شهرینده قورولان آذربایجان اولوسلارآراسی مدنیت مرکزینین آچیلیشی اوچون مراسیم تشکیل ائدیلدی
قوزئی قیبریس تۆرک جمهوریتینده قورولان آذربایجان اولوسلارآراسی مدنیت مرکزی، مراسیمله خیدمته آچیلدی.
قوزئی قیبریس تۆرک جمهوریتینده ۱۲ ایلدیر فعالیت گؤسترهن آذربایجان-قیبریس دوستلوق جمعیتی طرفیندن لاپتا شهرینده قورولان آذربایجان اولوسلارآراسی مدنیت مرکزینین آچیلیشی اوچون مراسیم تشکیل ائدیلدی.
مراسیمه، قوزئی قیبریس تۆرک جمهوریتی جمهورباشقانی چارسین تاتار، جمهوریت مجلیسی باشقانی زورلو تؤره، باشباخان اۆنال اۆستال، تۆرکیه، آذربایجان و قوزئی قیبریس تۆرک جمهوریتی پارلمانلار آراسی دوستلوق قروپلارینین عضولرینین یانیندا باخانلار، میللت وکیللری ایله وطنداشلار قاتیلدی.
قوزئی قیبریس تۆرک جمهوریتی جمهورباشقانی تاتار، مراسیمده دانیشماسیندا، باتی دونیاسینین، گونئی قیبریسین و آوروپا بیرلیگی عضوو بعضی اؤلکهلرین، هله ده قیبریسلی تۆرکلر اۆزرینده تحریملر و تجریدلر تطبیقینین، قیبریس تۆرک خالقینا ائدیلهن بؤیوک بیر پیسلیک اولدوغونو سؤیلهدی.
تاتار، قیبریس تۆرک خالقینین ییخیلماسی اوچون حیلهگرجه اویونلار اویناندیغینی ایفاده ائتدی.
قوزئی قیبریس تۆرک جمهوریتینین تۆرک دونیاسی اوچون اؤنمینه دقت چکهن تاتار، ماوی وطن ایله گؤی وطندهکی اولوسال چیخار و منفعتلرین قورونماسی باخیمیندان تۆرک بیرلیگینین اؤنملی اولدوغونو وورغولادی.
ارسین تاتار، قوزئی قیبریس تۆرک جمهوریتی ایله آذربایجان آراسینداکی ایلیشکیلرین داها دا گلیشمهسی لازیم اولدوغونو ایفاده ائدرک،
"بیرباشا اوچوشلارلا باکی و ارجان هاوالیمانلاری آراسینداکی بو اؤنملی کؤرپونو داها دا گوجلهندیرمک و آرامیزداکی تاریخی، مدنی و کؤنول باغلارینی گوجلهندیرمک، هامیمیزین آرزوسو و دیلهگیدیر" دئدی.
مرکزین بونیهسینده، کیتابخانا، شکیل آتلیهسی، تۆرک امکداشلیق و کووردیناسییون آژانسی (تیکا) دستگی ایله قورولان روباتیک کدلاما و آراشدیرما مرکزی، حیدر علییئو میراثینی آراشدیرما مرکزی، آذربایجان میللی رقصلر درنگی، آذربایجان و تۆرکیه تۆرکجهسی تعلیمی بؤلومو و ۳۰۰ نفرلیک آچیق هاوا فعالیت ساهحهسی بؤلوملری یئر آلیر.
مرکزین آچیلیشینین یانیندا آذربایجانین اؤنجهکی جمهورباشقانی و میللی لیدئری حیدر علییئوین هیکلی ایله "اورییمیزدهکی آذربایجان" آدلی فوتوگراف سرگیسی آچیلدی.