آمریکادان آذربایجان و ارمنیستانا چاغری

آمریکا بیرلشمیش دؤولتلری، آذربایجان و ارمنیستانا سرحد سببی ایله یاشانان گرگینلیین دوشورولمه‌سی و ایکی طرف آراسین‌داکی ارتباطین سورمه‌سی چاغریسی ائتدی.

آغ ائوده‌ن وئریله‌ن یازی‌لی آچیقلامادا، میللی گوونلیک مشاویری جیک سالیوانین آذربایجان پرزیدنتی ایلهام علی‌یئو و ارمنیستان باشباخانی نیکول پاشینیان ایله آیری-آیری تلفندا دانیشیب بؤلگه‌ده‌کی گرگین‌لیگی اله آلدیغی بیلدیریلدی.

آچیقلامایا گؤره سالیوان، سون دؤورده آذربایجان ایله ارمنیستان آراسین‌دا یاشانان سینیر گرگینلیین‌دن اؤترو قایغی دویدوقلارینی دیله گتیردی و هله تعیین اولونمامیش سرحدلرله باغلی عسگری آددیملارین تحریک سببی اولدوغونو ایفاده ائتدی.

سالیوان، ایکی اؤلکه آراسین‌داکی ارتباطین داوام ائتمه‌سین‌دن و ایکی لیدئرین پروبلئمین باریشچیل شکیل‌ده حلینه باغلی اولماسین‌دان ممنونیت دویدوقلارینی ایفاده ائتدی.

آذربایجان ایله ارمنیستانین اولوسلارآراسی سرحدلرینی تعیین ائده‌بیلمک اوچون رسمی گؤروشمه‌لر ائتمه‌سینین اؤنمینی وورغولایان سالیوان، آمریکانین مینسک قروپو چرچیوه‌سین‌ده بؤلگه‌ده گرگینلیگین دوشورولمه‌سی قونوسون‌داکی چابالارینا داوام ائدجگینی وورغولادی.

آذربایجان اوردوسونون، ارمنیستان ایشغالین‌دان قورتاریلان لاچین و کلبجر‌ده، ارمنیستان ایله سرحدده‌کی مؤوضعلره یئرلشمه‌سی ایکی اؤلکه آراسین‌دا گرگین‌لییه سبب اولموشدو.