تبریز- تهران-اردبیل-اورمیه بایرام-سیاحت سفرلری باشلادی
رمضان بایرامی توریزم سفری 16-23 ژوئن تاریخ‌لرینده تورکیه ایله بیرگه تشکیل ائدیلیر.
تهران-قزوین-زنجان-اردبیل-سرئین-تبریز-کندیوان-اورمیه سیاحت تورونا قاتیلماق ایسته‌ین‌لر ان گئج آوریلین سونونا قدر مراجعت ائتمه‌لی‌دیر.
16-23 ژوئن تاریخ‌لرینده تورکیه ایله بیرگه ایرانا رمضان بایرامی توریزم سفری تشکیل ائدیلیر.
تشکیلاتچی‌لار کمال تبریزلی و حیات یولداشی دیانا بو توریزم تورو ایله باغلی معلومات وئره‌رک دئدی‌لر: “2018-جی ایل تبریز ایسلام اؤلکه‌لری‌نین پایتختی سئچیلدی و بو، خاریج‌دن گلن‌لر اوچون یئنی ایمکان‌لار آچیر. بو ایلکی توریزم تورو دا اؤتن ایللر دفعه‌لرله تشکیل ائتدیگیمیز پروقرام‌لار اساسیندا حاضیرلانیب. تورکیه اورتاغیمیز حیدر جفروغلودور. اوچاق 16 ژوئن شنبه گونو آخشام تورکیه‌دن قالخیر، تهرانا ائنیر و 23-نده آنکارایا دؤنور. سیاحتچی تورک هاوا یول‌لاری و یا پگاسوس هاوا یوللاریندان هانسینی ایسته‌سه، سئچمک ایمکانی وار. بیلدیگینیز کیمی، ایران تورکیه وطنداش‌لارینا ویزا آلمیر. بو دا سیاحتی آسانلاشدیریر. ساده‌جه خاریجی پاسپورتون اولماسی یئترلی‌دیر. قیمتیمیز ده موناسیب‌دیر."
تورکیه‌دن ایرانا سیاحت تورونون اساس پروقرامی بئله‌دیر.
اوچاق آنکارا‌دان اوّلجه تهرانا گئدیر. ایلک گون ایمام خمینی مقبره‌سی‌نین زیارتیله باشلاییر. سونرا پایتخت تهرانین قدیم یئرلری، شهرین شمال حیسه‌سینده یئرلشن، طبیعت قوینوندا یئرلشن، دربند آدلانان منظره‌لی مکان وار سیرادا. بورا‌دان بوتون تهران منظره‌سی آچیلیر گؤز اؤنونده.
ایرانا سیاحت تورونون ایکینجی گونو توریست‌لری داغ باشین‌داکی الموت قالاسی گؤزلییر. قالانین تاریخی و حسن صباح ماجرا‌لاری ایله تانیش اولدوق‌دان سونرا صفوی‌لر دولتی‌نین پایتختلریندن اولان آذربایجان شهری قزوین سیاحتی باشلاییر.
یول اوستونده موغول‌لارین مؤحتشم اثری اولان سلطانییه‌نین زیارتین‌دن سونرا زنجان شهری گلیر. زنجانین اسکی حامامی و موزه‌سی گزیلیر.
سونرا آذربایجان شهری اردبیله سیاحت باشلاییر. میانا و خالخال شهرلرین‌دن کئچیب اردبیلده شاه ایسماعیل ختای مقبره‌سی زیارت ائدیلیر. آخشام سرئین‌ین مینرال سولو (ترمال) مشهور حامامی ایسته‌ین‌لرین ایختیاریندا اولور.
ارته‌سی گون یوزیل‌لر بویو ایران و آذربایجانین دولت‌لر پایتختی اولموش تبریزه یولچولوق باشلاییر. تبریزده شاعرلر مقبره‌سی، گؤی مسجید، بلدیه بیناسی، آذربایجان موزه‌سی، اؤرتولو بازار، ائل گؤلو کیمی تاریخی مکان‌لار گزیلیر.
تبریزدن سونرا اونون 50 کیلومترلیک مسافه‌سینده یئرلشن مین ایل‌لیک قایا ائولریله مشهور کندیوان گزینتی‌سی گلیر کی، بورا اینسانا بؤیوک طبیعت زؤوقو یاشا‌دیر.
توریست‌لر تبریزین شمالین‌داکی عینا‌لی داغینا دا چیخماق ایمکانی قازانیر. اورادا هم یئمک یئییر، هم ده تبریزین گؤزل منزره‌سینی یوخاری‌دان سئیر ائتمک مومکون‌دور.
تبریزدن سونرا اورمیه گؤلونو کئچیب، 2 ساعت‌دان سونرا شهرینه یئتیشیلیر. بورادا بند و "دنیز ساحیلی" پارکی گزیلیر.
ارته‌سی گون توریست‌لر اورمیه‌‌دن اسئن ئره سرحد قاپیسینا یول‌لانیر، ایران‌دان چیخیب تورکیه‌یه کئچیرلر. اوچ ساعت‌لیق یولچولوق‌دان سونرا وان‌دا تور ایمکانی اولور. سوندا آنکارایا گئری قاییدیلیر.
تشکیلاتچی کمال تبریزی دئییر: "تورکیه‌دن ایرانا سیاحت تورو ان آز 6 نفرین ایشتیراکیله 5 گون ایچینده گئرچکلشیر. تهران-قزوین-زنجان-اردبیل-سرئین-تبریز-کندیوان-اورمیه سیاحت تورونا قاتیلماق ایسته‌ین‌لردن ان گئج آوریل آیی‌نین سونونا قدر مراجعت ائتمه‌لری خاهیش اولونور. توریست‌لر بو سیاحت‌دن چوخ بؤیوک معنوی ذؤوق آلیر. مادی طرفی ایسه 1650 لیره و اوسته گل اوچاق پولون‌دان عبارت‌دیر. ماراق‌لانان‌لار مراجعت ائدنلر و عینی زاماندا، سوال‌لارینی کمال تبریزلی “فیسبوک” و knik70yahoo.com ایله چات‌دیرا بیلرلر".
