ایرانین "عدالت" دویغوسو و حبسخانالاریندا ایشگنجه گؤرن تورکلر- سئویل نورییئوا
اؤز آنا دیلینده اوخوما یازما طلبی، یاییقین و تورکلرین هامیسی طرفیندن منیمسنمیش بیر ایستکدیر
ایران دؤولتینین، ایراندا یاشایان تورکلره قارشی، داها دوغروسو اؤز دیللرینده اوخول ایستهینلره و میلی حساسیتلرینه قارشی ایران دؤولتیندن وئردیگی سؤزلری توتماسینی ایستهین قروپا قارشی توتومو گئدهرک داها دا سرتلشمکدهدیر.
روحانینین حاکمیته گلیشی، بیرآز اولسا دا اینسانلاردا، تورکلرین طبیعی آنا دیلی قونوسونداکی طلبلرینه باخیش آچیسینین دییشجهگینه دایر اومودلار آرتمیشدی. روحانینین اصلاحات ایچریکلی جملهلری و اؤزللیکله تورکلره قارشی حاق و حقوق تانیمینا یئنیدن باخیلاجاغینی احتیوا ائدن سؤزلری وار ایدی. آنا دیلینده مکتب، اونیورسیته حاقی، ایراندا جمعیت چوخلوغو اولان بیر خالقین ان طبیعی حاقلاریندان بیریدیر البته. ایراندا تورکلیرن جمعیتی، چوخدور. البته اوراداکی تورکلرین سیاسی باخیشلاری دا، تک رنگلی دئییل حالییلا.
حتی ایرانداکی تورکلرین تیجاری ساحهده چوخ باشاریلی اولدوغو گئرچیی ده مؤوجوددور. آیریجا ایران دؤولت عنعنهسی ایچریسینده، تورک کؤکهنلی شخصلرین اولماسی حقیقتی ده سؤز قونوسودور. ایران دؤولتینین اؤزل و قدار تپکیسی، ایراندا آنا دیلی، میلی حاق و اؤزگورلوکلر ایستهین تورک قروپونادیر. تبریز مرکزلی اینسان پتانسیلینین، اؤز میلی حاقلارینا باخیش آچیسی آچیقدیر. بونو، تبریز کوچهلرینده یئریرکن دانیشیلان یالنیز بیر دیلین، تورک دیلینین مؤوجودیتیندن آنلاییریق. لاکین هامیسینین سیاسی گؤروشونون عینی اولدوغونو سؤیلمک مومکون دئییل. طالعینی، ایران دؤولتینین چاتیسی آلتیندا گؤرمک ایستهین و آیریلما کیمی بیر دویغودان چوخ اوزاق تورک اهالیسی ده چوخدور. آنجاق اؤز آنا دیلینده اوخوما یازما طلبی، یاییقین و تورکلرین هامیسی طرفیندن منیمسنمیش بیر ایستکدیر.
حاضردا ایران حبسخانالاریندا، جدی ساییدا سیاسی فیکیرلرینه گؤره حبس اولونان تورکلر واردیر. بونلار اؤزللیکله آذربایجان و تورکیهیه کؤنول وئرمیش و بورالاردان دستک گؤزلهین قروپدور. ایرانداکی؛ بو ساده اینسان حاقلارینی یوخ سایان طلبلره تطبیق اولونان زورلامالار، تضییقلر و ایشگنجهلر، کیمسهنین گوندمینه گلمهمهکده تأسف کی! بعضا بیرلشمیش میلتلره گؤندریلن بیر نئچه راپور اولور. اوندان باشقا باتیداکی اینسان، حاق و اؤزگورلوکلرینی اؤزونه بایراق ائدن قوروملار، بو گئرچکلری گؤرمزلیکدن گلمهیه داوام ائتمکده. باتیلی قورولوشلار ایکیده بیر تورکیهده حاق و اؤزگورلوکلردن دانیشارکن، بیر جمله ایله بئله ایرانداکی اینسان حاقلارینا یئر آییرمامالاری معنالیدیر البته!
گونلردیر تبریزده حبسخانادا توتولان رسول رضوی، مرتضی مرادپور آجلیق آکسیاسیندا. رسول رضوی 21.جی گونونده، مرتضی مرادپور 43.جو گونونده.(دوزلتمه: رسول رضوی 43.جو، مرتضی مرادپور 21.جی گونونده) ایران دؤولتی، بو ایکی تورک آکتیویستی کرج زیندانیندا توتور. مرتضی مرادپورون، تانینماز حالا گلنه قدر دؤیولدوگو ادعاسی سؤز قونوسودور. قارداشینین گؤروشمه اصرارلارینا باخمایاراق، بو مومکون اولابیلمهمیش. یاخشی بو ایکی یولداش ندن حبسده توتولورلار؟ بیری، هر رمضانین سون جمعهسی ایران دؤولتینین گرچکلشدیردیگی قدس یئریییشینه قاتیلاراق "اویغور تورکلرینه دستک اول ایران" پلاکاردی آچدیغی اوچون توتوقلانمیش. اوبیری ایسه، آنا دیلینده اوخول طلبی و ایران تلویزیونوندا تورکلری آشاغیلایان یایین سببیله اعتراض یئریییشینه قاتیلدیغی اوچون بو گون زینداندا!
بونلاری یازدیغیمیزدا، ایران قیزیر بیزه اما اورتادوغو جغرافیاسیندا اویقولادیغی بؤلوجو سیاستین یانی سیرا اؤز وطنداشلارینین ساده و طبیعی طلبلرینه قولاق وئرمهسی، داها اینسانجیل اولمازدی می؟
سیاسی ایچریکلی محکمهلرین هامیسیندا، عدالتسیزلیک سببیله اعتراضلار سؤز قونوسودور. نیه، ایران بو اعتراضلارا قولاق وئرمکدن قاچماقدا؟
روحانی، اقتدارا گلدیگینده وئردیگی سؤزلرین هئچ بیرینی توتمادی. بلکه ایرهلیده اولور، اونو بیله بیلمرم اما گلدیگیمیز بو گون کی نقطهده، تأسف کی، تورکلرین آنا دیلینده اوخوما طلبلرینه قولاق وئریلمهمهکده و بونو دیله گتیرنلرین یئری حبسخانا اولاراق تعیین اولونماقدا! بئله بیر اورتامدا، سیویل توپلوم قورولوشلاری و اینسان حاقلاری قوروملارینین، اؤزللیکله تورکیه مرکزلی تشکیلاتلارین، بو قونولارا قولاق وئرمهسی لازیمدیر. آذربایجاندان چیخان دستک سسلری یئترلی دئییل و یا آذربایجان داها چوخونو ائدهممهمکده. مئدیانین بونا یئر آییرماسی، بو قونونو جانلی توتماسی، اوراداکی حاقسیزلیغا اوغرایان قارداشلاریمیزین ان چوخ ایستهدیگی شئیدیر. ایرانداکی تورکلرین سسینه قولاق وئریلمهسی لازیم! ایران بیر ایسلام دؤولتیدیر، اؤز تانیمینا گؤره! ایسلام؛ عدالت دئمکدیر. ایرانین؛ تورکلره قارشی اویقولامالارینداکی دنگه آیریمی، تورکلرین تاریخی یئرلشیم یئرلرینی، تاریخی عابیدهلرینی یوخ ائدن اویقولامالاری، بو عدالت دویغوسونون اولمادیغینی، هر گئچن گون داها دقیق گؤستریر. ایرانداکی تورکلرین طبیعی آنادیل حاقینی تانیمایان، بونو ایستهینلره زیندانی روا گؤرن ایران، اورتا دوغونون "قورتاریجیسی" ایمیش، سیزجه ده ائله می؟!
استار قازئتهسی
ایلگیلیلی خبرلر
آذربایجان جمهوریتیندن رئیسی اوچون باشساغلیغی
آذربایجان جمهورباشقانی ایلهام علییئو، ایران دینی لیدئری علی حامنهاییه باشساغلیغی مئساژی گؤندردی