لطیف حسنیدن حسن روحانییه آچیق مکتوب
دکتر حسنی، ایچ طلبلری اومورساماما و بو طلبلرین باسدیریلماسی کور دؤنگوسونه سون وئریلمهسینی ایستهدی
یئنی گاموح حزبینین توتوقلو باش یازمانی لطیف حسنی، ایران جمهور باشقانینا خطابا بیر مکتوب یازدی.
رجایی شهر حبس خاناسیندا 9 ایللیک حبس جزاسینی چئکمکده اولان دکتر لطیف حسنی، روحانییه یازدیغی آچیق مکتوبدا، نوکلئر آنلاشما سونراسی، نظامین ایچ طلبلره قارشی باخیشی آچیسینین دییشمهسینی ایستهدی. ایراندا یاشایان تورکلرین و باشقا اقلیتلرین حاقلارینین تانینماسی گرکدیگینی یازان دکتر حسنی، ایچ طلبلری اومورساماما و بو طلبلرین باسدیریلماسی کور دؤنگوسونه سون وئریلمهسینی ایستهدی.
آذربایجانین اؤلکهنین اقتصادی و سیاسی مرکزی اولدوغونا توخونان یئنی گاموح باش یازمانی مکتوبوندا، بو بؤلگهنین انسانلارینا گؤونیلمهسی، دیلی و کولتورونه سایغی گؤستریلمهسی و اونا کیملیک اویدورولماسیندان اوزاق دورولماسی گرکدیگینی یازدی.
مکتوبون داوامیندا، تورک دیلینه قارشی اویقولانان سینیرلامالارین قالدیریلماسی و تورکجهنین اؤلکهنین ائگیتیم سیستمینه داخیل ائدیلمهسی، رادیو و تلویزیونلاردا آذربایجان تورکلری و باشقا بؤلگهلرده یاشایان تورکلر اوچون تورکجه پروگراملارین یایینلانماسی، اورمیه گؤلونون قورتاریلماسی، آذربایجانا امنیتی باخیش آچیسیلا باخیلماماسی و بؤلگهیه ایچ و دیش یاتیریملارین آخیمینین ساغلانماسی کیمی طلبلر سیرالانمیشدیر.
باش یازمان لطیف حسنی و یئنی گاموح حزبینین مرکز کمیتهسی عضولری یوروش مهرعلیبگلو، محمود فضلی، بهبودقلی زاده و شهرام رادمهر، یاسادیشی تشکیلات قورماق و نظام علیهینه تبلیغات یئریدمک سوچلاریندان توتوقلانمیش، کسیلن 9 ایللیک حبس جزالارینی چئکمدهدیرلر.
ایلگیلیلی خبرلر
آذربایجان جمهوریتیندن رئیسی اوچون باشساغلیغی
آذربایجان جمهورباشقانی ایلهام علییئو، ایران دینی لیدئری علی حامنهاییه باشساغلیغی مئساژی گؤندردی