تۆرک جمهوریتلرینین اولوسلارآراسی قورولوشلارینین سون آیلارداکی فعالیتلری-۲
تۆرکسوی، اولوسلارآراسی تۆرک آکادمیسی و اولوسلارآراسی تۆرک مدنیت و میراث وقفی تۆرک جمهوریتلرینین بیرلیگی، بوتونلوگو و اولوسلارآراسی ساحهده تمثیل ائدیلمهسی قونوسوندا دقته دگر ایشلره ایمضا آتیرلار
بیر اؤنجهکی پروگرامیمیزدا تۆرک دؤولتلر تشکیلاتی و تۆرکپانین سون آیلارداکی فعالیتلری اۆزرینده دوروموشدوق. ایندی تۆرکسوی، اولوسلارآراسی تۆرک آکادمیسی و اولوسلارآراسی تۆرک مدنیت و میراث وقفینین ایشلرینه گؤز آتاق.
۱ فوریه ۲۰۲۴ تاریخینده تۆرک دؤولتلر تشکیلاتی آغساققاللار هیئتی باشقانی بینعلی ییلدیریم تۆرکسویا گئتدی. تۆرکسوی باش یازمانی سلطان رائو- بینعلی ییلدیریم گؤروشمهسینده تۆرک دۆنیاسینین گلهجگینه دایر پلانلانان پروژهلر اله آلیندی.
۱۳ فوریه ۲۰۲۴ تاریخینده آستانادا اولوسلارآراسی تۆرک آکادمیسی و لئو گومیلئو آوراسیا میللی اونیوئرسیتهسی اورتاق شکیلده ۸ جیلدلیک تۆرک بشری بیلیملر انسیکلوپدیسینین تانیتیم ییغینجاغینی تشکیل ائتدیلر. تۆرک بشری بیلیملر انسیکلوپدیسی گۆنئی کرهلی بیلیم آداملاری طرفیندن حاضرلاندی.
۱۴-۱۵ مارس ۲۰۲۴ تاریخلرینده باکیدا اولوسلارآراسی تۆرک آکادمیسی، تۆرک مدنیت و میراث وقفی، آذربایجان و تۆرکیه یونسکو میللی کومیسیونلارینین اورتاق شکیلده تشکیل ائتدیگی "یونسکو باخیش آچیسیندان تۆرک دۆنیاسینین تاریخی و مدنی میراثینین آراشدیریلماسی و قورونماسی" آدلی کنفرانس ائدیلدی. کنفرانسا اولوسلارآراسی تۆرک قورولوشلارینین باشقانلاری تام اولاراق قاتیلدی.
۲۰ فوریه ۲۰۲۴ تاریخینده تۆرکسوی باش کاتیبلیگی بیناسیندا رئوف دنکتاش دوغومونون ۱۰۰.جو ایلدؤنومو دولاییسیلا آنیلدی. ییغینجاقدا قوزئی قیبریس تۆرک جمهوریتی قوروجو جمهورباشقانی رئوف دنکتاشین صنعتچیلیک، یازیچیلیق و شاعرلیک کیمی فرقلی یؤنلری قاتیلیمچیلارا تانیدیلدی.
۲۱ مارس ۲۰۲۴ تاریخینده آنکارادا تۆرک دۆنیاسی صنعت اونیوئرسیتهلری بیرلیگی ۳.جو ییغینجاغی گئرچکلشدیریلدی. تۆرک دۆنیاسی صنعت اونیوئرسیتهلری بیرلیگینین بیر سونراکی ییغینجاغینین باکیدا ائدیلمهسی قرارا باغلاندی.
۲۱-۲۲ مارس ۲۰۲۴ تاریخلرینده اولوسلارآراسی تۆرک مدنیت و میراث وقفی باشقانی آکتوتی رایمکولووا فرانسایا ایش سفری گئرچکلشدیردی. باشقان رایمکولووا پاریس شهرینده یونسکو اۆست دوزئی نمایندهلری و ائلچیلر ایله گؤروشدو.
***
۲۶-۲۹ مارس ۲۰۲۴ تاریخلرینده تۆرکمنیستاندا آنئو ۲۰۲۴ تۆرک دۆنیاسی مدنیت باشکندی آچیلیش فعالیتلری تشکیل ائدیلدی. آچیلیشا تۆرک جمهوریتلری مدنیت باخانلاری، اولوسلارآراسی تۆرک قورولوشلاری باش کاتیبلری و باشقانلاری قاتیلدیلار.
فعالیت چرچیوهسینده اولوسلارآراسی تۆرک قورولوشلارینین گیریشیمی ایله ۲۶ مارس تاریخینده تۆرکمنیستاندا توریزم گلیشیمینین یؤنو و فورصتلر، ۲۷ مارس تاریخینده قدیم آنئو مدنیتی، ۲۸ مارس تاریخینده تۆرکمن دیار قدیم مدنیتلرین مرکزی آدلی اولوسلارآراسی کنفرانسلار و اولوسلارآراسی مئدیا فورومو تشکیل ائدیلدی. تۆرکسوی موزهلر بیرلیگی عضولری ده بیر آرایا گلهرک اؤز گۆنجل پروبلئملرینی ماسایا یاتیرتدیلار. ۲۰۲۴ ایلی بویو تۆرک جمهوریتلرینده مختومقولی فراغینی آنما ایلی فعالیتلری تشکیل ائدیلهجک.
گلیشمهلردن گؤرولدوگو اۆزره، تۆرکسوی، اولوسلارآراسی تۆرک آکادمیسی و اولوسلارآراسی تۆرک مدنیت و میراث وقفی تۆرک جمهوریتلرینین بیرلیگی، بوتونلوگو و اولوسلارآراسی ساحهده تمثیل ائدیلمهسی قونوسوندا دقته دگر ایشلره ایمضا آتیرلار. بو ایل قازاقیستاندا ائدیلهجک ۵.جی دۆنیا کؤچری اویونلاری تۆرک خالقلارینین دۆنیایا تانیتیمینا بؤیوک قاتقی وئرهجک.
ایلگیلیلی خبرلر
تۆرک جمهوریتلرینین گوندمیندهکی گلیشمهلر
حاضردا دونیانین ۱۵ اؤلکهسینده ۲۹ آذربایجان ائوی خیدمت ائتمکدهدیر