ارمنیستاندا گئرچکلشدیریلن کولکتیو آنلاشما تشکیلاتی ذیروهسی و تشکیلاتین گلهجگی
روسیانین، هر نه قدر ارمنیستانین حمایهچیسی مؤقعتینده اولسا دا، قاراباغ مسئلهسینده آذربایجان و تورکیهنی قارشیسینا آلابیلمهیهجگی آشکاردیر
ارمنیستاندا گئرچکلشدیریلن کولکتیو آنلاشما تشکیلاتی ذیروهسی و تشکیلاتین گلهجگی
۲۴ نوامبر ۲۰۲۲ تاریخینده ارمنیستانین باشکندی ایرواندا کولکتیو گوونلیک آنلاشماسی تشکیلاتی ذیروهسی گئرچکلشدیریلدی. ذیروهیه بلاروس، ارمنیستان، قازاقیستان، قیرقیزیستان، روسیا و تاجیکیستان لیدئرلری قاتیلدیلار. ذیروهده گۆنجل بؤلگهسل و اولوسلارآراسی مسئلهلر، تشکیلاتین گوندمینده اولان پروبلئملر و امکداشلیق ایمکانلاری اله آلیندی. ارمنیستان باش باخانی نیکول پاشینیان ذیروه سونوج بیلدیرگهسینده آذربایجانین سالدیرقان دؤولت اولاراق ایفاده ائدیلمهسینی ایستهمیشدی. دیگر دؤولتلر بونو قبول ائتمهدیگی اوچون پاشینیان سؤز قونوسو سندی ایمضالامایاراق اعتراض ائتدی. مئدیادا ارمنیستانین تشکیلاتدان آیریلاجاغینا دایر خبرلر چیخدی. بو وضعیت تشکیلاتین گلهجگینین نئجه شکیللهنهجگی مسئلهسینی گوندمه گتیریر.
ارمنیستاندا بعضی کسیملر آذربایجان-ارمنیستان ساواشیندا تشکیلاتین کؤمک ائتمهدیگینی سبب گؤسترهرک ارمنیستانین کولکتیو گوونلیک آنلاشما تشکیلاتیندان چیخماسینی طلب ائدیرلر. ذیروهنین ائدیلدیگی گون ایروان کوچهلرینده روسیا و تشکیلات قارشیدی اعتراضلار ائدیلدی. مؤوجود شرطلرده ارمنیستانین تشکیلاتدان آیریلماسی اولاسی دئییل. چونکو ارمنیستانین روس باریش گوجلرینه احتیاجی سؤز قونوسودور. باشباخان پاشینیانین ذیروهدهکی اعتراضینی بیر آز دا ایچ سیاسته ایستیقامتلی اولاراق اوخوماق لازیمدیر.
ذیروه سونراسی قازاقیستان جمهورباشقانلیغی وب سایتیندا ۱ ژانویه ۲۰۲۳ تاریخینن اعتباراً تشکیلاتین باش کاتیبلیگی وظیفهسینه کاسکی باشباخان ایمانگالی تاسماگامبتووون گتیریلهجگینه دایر معلومات پایلاشیلدی. بو وضعیت ارمنیستانین تشکیلاتدان ایستهدیگی دستگی آلابیلمهیهجگینی، قاراباغ پروبلئمی ایله باغلی تشکیلاتین مؤوجود توتومونون داوام ائدجگینه ایشاره ائدیر. اونسوز دا آذربایجان جمهورباشقانی ایلهام علییئو ذیروه اولینده بیر آچیقلاما وئررک، کولکتیو گوونلیک آنلاشما تشکیلاتین آذربایجانین ارمنیستاندان داها چوخ دوستا صاحب اولدوغونو آچیقلامیشدی. روسیانین هر نه قدر ارمنیستانین حمایهچیسی مؤقعتینده اولسا دا، قاراباغ مسئلهسینده آذربایجان و تورکیهنی قارشیسینا آلابیلمهیهجگی آشکاردیر.
***
بلاروس جمهورباشقانی آلکساندر لوکاشنکو، ذیروهده ائتدیگی دانیشماسیندا تشکیلاتین طالعینین روسیانین اوکرایناداکی اؤزل عملیاتین موفقیتینه باغلی اولدوغونو، روسیانین اودوزماسی وضعیتینده تشکیلاتین دا چؤکهجگینی سؤیلهدی. روسیا لیدئرلیگینده بؤلگهسل گوونلیگی متامین ائتمه مقصدی ایله قورولان تشکیلاتین گلهجگی حقیقتاً ده روسیانین وضعیتینه بیر باشا باغلی وضعیتدهدیر.
گئریده قالان ۳۰ ایل عرضینه کولکتیو گوونلیک آنلاشما تشکیلاتی قئیده دگر موفقیت الده ائدهبیلمهدی. قیرقیزیستان-تاجیکیستان، قیرقیزیستان-اؤزبکیستان، آذربایجان-ارمنیستان سرحد پروبلئملرینده تشکیلات اؤز آغیرلیغینی اورتایا قویاراق پروبلئملرین حله قوووشماسینا قاتقی وئرهبیلمهدی.
باشلانغیجدا تشکیلاتا عضو دؤولت ساییسی دوققوز ایکن زامانلا آلتییا ائندی. مؤوجود شرطلرده تشکیلاتین گئنیشلهمهسی ده سؤز قونوسو دئییل.
اوکراینا-روسیا ساواشیندا بئلاروس خاریجینده تشکیلاتا عضو دؤولتلر روسیانین اوکرایناداکی "عسگری عملیاتینی" دستکلهیهن آچیقلامالار وئرمهدیلر.
گئچدییمیز ژانویه آییندا قازاقیستاندا میدانا گلن حادثهلرده تشکیلاتین باریش گوجلری قازاقیستاندا وضعیتین ثابتلیگه قوووشماسینا قاتقی وئردیلر. بو وضعیت تشکیلاتین گئچمیشینده ثبته گئچهن حادثهلرین ان اؤنملیسیدیر. آنجاق بو باشاری بئله تشکیلاتین ناتو طرزی اولوسلارآراسی گوونلیک تشکیلاتینا چئوریلمکدن چوخ، بؤلگهسل پلیس گوجو قونوموندا اولدوغونو اورتایا قویور.
ایلگیلیلی خبرلر
تۆرک جمهوریتلرینین گوندمیندهکی گلیشمهلر
حاضردا دونیانین ۱۵ اؤلکهسینده ۲۹ آذربایجان ائوی خیدمت ائتمکدهدیر