اتیوپی و اریتره، باریش آنلاشماسی ایمضالادی

آفریقا بوینوزو اؤلکه‌لری افیوپی و اریتره، باریش آنلاشماسی ایمضالادی.

سعودی عربیستانی رسمی خبر آژانسی SPA-دا یئر آلان خبره گؤره، سعودی عربیستانی کرا‌لی سالمان بن عبدالعزیز ائو صاحیبلیگینده جیده شهرینده بیر آرایا گلن اتیوپی باش ناظیری آبی احمد ایله اریتره پرزیدنتی ایسایاس آفورکی، باریش آنلاشماسینا ایمضا‌لارینی آتدی.

کرال سالمان ایکی لیدره "کرال عبدالعزیز نیشانی" تقدیم ائدیب.

ایمضا مراسیمینده سعودی عربیستانی‌نین ولیعهد شاهزاده، باش ناظیرین معاوینی و ساوونما ناظیری محمد بن سالمان، بیرلشمیش میللت‌لر تشکیلاتی‌نین باش (بمت) کاتیبی آنتونیو گوترز ایله بیرلشمیش عرب امیرلیک‌لری‌نین خاریجی ایشلر ناظیری عبدالله بن زاید آل نهیان دا قاتیلیب.

اتیوپی و اریتره لیدرلری‌نین ژوئیه آییندا کئچیردیگی قارشی‌لیق‌لی سفر سونراسیندا طرف‌لر آراسین‌داکی بوزلار اریمیش، عمومی باریش و دوستلوق دکلاراسیونو ایمضا آتیلمیشدی.

ایکی اؤلکه، باریش آنلاشماسی سونراسی سفیرلیک‌لرینی ده قارشی‌لیق‌لی اولا‌راق یئنی‌دن آچماق قراری آلمیشدی.

اریتره نین 1993ده اتیوپی‌دن موستقیل‌لیگینی الده ائدن‌دن سونرا ایکی اؤلکه آراسیندا سرحد موناقیشه‌لری سببی ایله 1998-2000-جی ایللرده باش وئرن ساواش‌دا اون مین‌لرله اینسان اؤلموشدو.

الجزایرده 2000ده ایمضا‌لانان آنلاشمانین آردین‌دان اتیوپی نین بعضی موباحیثه‌لی ساحه‌لردن چکیلمگی رد ائتمه‌سی ایله ایکی اؤلکه آراسین‌داکی گرگین‌لیک داوام ائتمیشدی.

بو آرادا، بیرلشمیش میللت‌لر تشکیلاتی‌نین باش کاتیبی آنتونیو گوترز، اتیوپی و اریتره آراسیندا باریش آنلاشماسی ایمضالانماسینی، "تاریخی حادثه" و "باریش اوچون اومید پنجره‌سی" کیمی قیمتلندیردی.