جو بایدن مصر و قطر لیدرلری ایله غزه مسئله‌سین دانیشیب

آمریکا پرزیدنتی جو بایدن مصر و قطر لیدرلری ایله دانیشیقلاریندا اونلاردان غزه‌ده آتیش‌کس الده ائتمک و توتوقلولاری آزاد ائتمک اوچون حماس اوزرینده تأثیرلریندن ایستیفاده ائتمه‌لرینی ایسته‌ییب.

آغ ائودن وئریلن یازیلی آچیقلامایا گؤره، جو بایدن مصر پرزیدنتی عبدالفتتاح السیسی و قطر امیری شیخ تمیم بن حمد آل ثانی ایله تلفونلا دانیشیب.

بایدن، حاضیردا ماسادا اولان و مصر و قطرین ‌ده ایشتیراک ائتدیگی غزه ایله باغلی آتیش‌کس دانیشیقلاری ایله باغلی پروسه‌نی هرطرفلی موذاکیره ائده‌رک، بو مؤوضوعدا گؤستردیکلری سعیلره گؤره سیسی و شیخ تمیمه تشکور ائدیب.

حماس ماساداکی تکلیفی قبول ائدرسه غزه‌ده درحال آتیش‌کس الده ائدیله‌جَیینی، چوخلو اینسانی یاردیمین بؤلگه‌یه داخیل اولاجاغینی و بونون موقابیلینده حماس طرفیندن ساخلانیلان توتوقلولارین آزاد ائدیله‌جَیینی قید ائدن بایدن، مصر و قطر لیدرلرین‌دن آتیش‌کس راضیلاشماسی ایله باغلی حماس اوزرینه تأثیرلرینی ایستیفاده ائتمه‌لرینی ایسته‌ییب.

آوریلین 26-دا مصر و قطرین واسیطه‌چیلیگی ایله حاضیرلانان یئنی آتیش‌کس و قارشیلیقلی محبوس موبادیله‌سی راضیلاشماسی تکلیفینین حماسا تقدیم ائدیلدیگی و حماسین بو تکلیف اوزرینده چالیشدیغی و تئزلیکله جاواب وئره‌جَیی آچیقلانیب.

آتیش‌کس راضیلاشماسی پروسه‌سی ایله باغلی مصر مطبوعاتی حماس هیئتینین قاهره‌نی ترک ائتدیگینی و مصرین غزه زولاغیندا آتشکس راضیلاشماسی تکلیفینه یازیلی جاواب وئره‌جَیینی بیلدیریب.