اوردون-دا امریکا عسگرلرینه هوجوم اولوب، 3 عسگر اؤلوب
اوردون-دا یئرلشن امریکا قوهلرینه قارشی اینسانسیز هاوا آراجی (ایها) ایله حیاتا کئچیریلن هوجومدا 3 امریکا عسگرینین اؤلدوگو بیلدیریلیب.
اوردون-دا یئرلشن امریکا قوهلرینه قارشی اینسانسیز هاوا آراجی (ایها) ایله حیاتا کئچیریلن هوجومدا 3 امریکا عسگرینین اؤلدوگو بیلدیریلیب.
امریکا پرزیدنتی جو بایدن " اوردون-ون قوزئی – دوغوسوندا، سوریه سرحدی یاخینلیغیندا یئرلشن قوهلریمیزه اینسانسیز هاوا آراجینین هوجومو نتیجهسینده 3 امریکا عسگری هلاک اولوب و چوخلو سایدا یارالی وار" دئییب.
هوجوملا باغلی هله ده معلومات توپلادیقلارینی قئید ائدن بایدن "بونون سوریه و عراق-دا فعالیت گؤسترن ایرانین دستکلهدیگی رادیکال سلاحلی قروپلار طرفیندن حیاتا کئچیریلدیگینی بیلیریک" دئیه وورغولاییب.
هوجوما گؤره مسئولیت داشییانلارین امریکانین سئچدیگی واختدا و شکیلده جاواب وئرهجکلرینی ایفاده ائدن بایدن بو محاربهده موباریزهیه داوام ائدهجکلرینی قئید ائدیب.
امریکانین ساوونما ناظیری لوید آستین ده "ایرانین دستکلهدیگی میلیسلر امریکا قوهلرینه هوجوملارا گؤره مسئولیت داشیییر و بیز سئچدیگیمیز واخت و یئرده جاواب وئرجییک" دئییب.
"امریکایی، قوشونلاریمیزی و ماراقلاریمیزی مدافعه ائتمک اوچون بوتون لازیمی آددیملاری آتاجاغیق"، -دئیه او قئید ائدیب.
خاطیرلاداق کی، امریکا مرکزی قوموتانلیغیندان (سنتکام) وئریلن یازیلی آچیقلامادا اوردون-ون قوزئی – دوغوسونا اینسانسیز هاوا آراجینین بیرطرفلی هوجومو نتیجهسینده 3 امریکا عسگرینین اؤلدوگو، 34 عسگرین ایسه یارالاندیغی بیلدیریلیب.
اوکتبرین 7-ده ایسراییل و فیلیسطین آراسیندا موناقیشه باشلایاندان بری عراق و سوریه-ده امریکا عسگرلرینین یئرلشدیگی بازالارا 150-دن چوخ هوجوم حیاتا کئچیریلیب.