ایسراییل خان یونوس شهرینه ضربه ائندیریب
ایسراییل غزه زولاغیندا خان یونس شهرینه ضربه ائندیریب.
ایسراییل غزه زولاغیندا خان یونس شهرینه ضربه ائندیریب.
10 مین سیویل فیلیسطین‌لی‌نین سیغیندیغی بیرلشمیش میللت‌لر تشکیلاتی‌نین (بمت) تعلیم مرکزینده 12 نفر اؤلوب، اونلارلا اینسان یارالانیب.
هوجوم‌دان سونرا بمت باش کاتیبی‌نین معاوینی مارتین گریفیتس غزه زولاغیندا آیلاردیر باش وئرن‌لری "ویجدان‌سیزلیق" آدلاندیریب.
مارتین گریفیتس ایسراییلین فیلیسطین‌لیلردن بؤلگه‌نی بوشالتما‌لارینی ایسته‌دیگینی، لاکین اونلار ترک ائتمک فورصتی تاپا بیلمه‌دن اورانی بومبالادیغینی سؤیله‌ییب.
بمت-نین فیلیسطین خصوصی نوماینده‌سی فرانچسکا آلبانزه ده خاطیرلادیب کی، بو، اولوسلار آراسی جینایت محکمه‌سی‌نین روما ایستاتوتونا گؤره آغیر اولوسلار آراسی جینایت‌دیر.
اولوسلار آراسی موشاهیدچی‌لر ایسراییلین اولوسلار آراسی عدالت محکمه‌سینده محاکیمه اولوندوغو گونلرده غزه زولاغیندا داوام ائدن وحشی هوجوم‌لارینا دقت چکیب‌لر.
قئید ائدک کی، ایسراییل گون‌لردیر کی، غزه زولاغیندا خان یونیسی بومبالاییر. اینسان‌لار تشویش ایچینده شهری ترک ائده‌رک رفح چاتماغا چالیشیرلار. اما غزه زولاغیندا هئچ بیر یئر تهلوکه‌سیز دئییل.
ایسراییلین خان یونسا هوجوم‌لاری ایله باغلی یایدیغی گؤرونتولر شهرده‌کی داغینتی‌لاری و وحشی‌لیگی گؤزلر اؤنونه سریر.
فیلیسطین مقاومت حرکاتی "حماس" دا خان یونیس‌دکی قارشیدورما‌لاردا 10 ایسراییل عسگری‌نین اؤلدورولدوگونو آچیقلاییب.
