پاکیستان ایله ایران آنلاشدی
تهران و اسلام آبادین، ایکی اؤلکه‌نین ائلچیلرینین ۲۶ ژانویه‌یه قدر وظیفه‌لرینه قاییدابیله‌جکلری قونوسوندا راضی قالدیغی ایفاده ائدیلدی
پاکیستان و ایران، ایکی اؤلکه‌نین ائلچیلرینین ۲۶ ژانویه‌یه قدر وظیفه‌لرینه دؤنه‌بیله‌جکلری قونوسوندا آنلاشدی.
پاکیستان خاریجی ایشلر باخانلیغیندان وئریله‌ن آچیقلامادا، خاریجی ایشلر باخانی جلیل عباس جیلانی ایله ایران خاریجی ایشلر باخانی حسین امیرعبداللهیانین تلفن دانیشماسیندان سونرا تهران و اسلام آبادین، ایکی اؤلکه‌نین ائلچیلرینین ۲۶ ژانویه‌یه قدر وظیفه‌لرینه قاییدابیله‌جکلری قونوسوندا راضی قالدیغی ایفاده ائدیلدی.
آچیقلامادا، باخان جیلانینین دعوتی اوزرینه ایران خاریجی ایشلر باخانی امیرعبداللهیانین ۲۹ ژانویه‌ده پاکیستانا سفر ائدجگی بیلگیسیی پایلاشیلدی.
ایران، ۱۶ ژانویه‌ده پاکیستان تورپاقلارینا موشک و هاوا آراجلاری ایله سالدیری تشکیل ائد‌رک ترور عنصورلارینی هدف آلدیغینی بیلدیرمیشدی.
پاکیستان دا گئجه ساعاتلاریندا ایرانین سرحد بؤلگه‌سینده‌کی بیر نقطه‌نی موشکلرله ووراراق، تروریستلره قارشی عملیات ائتدیگینی بیلدیرمیشدی.
طرفلر بیر بیرینی قینایارکه‌ن، سالدیریلاردا وطنداشلارین اؤلدوگونو، "دوست و قارداش اؤلکه‌لر" اولاراق بیر بیرینین تورپاق بوتونلوکلرینه حؤرمت ائتدیکلرینی آچیقلامیشدی.
اسلام آباد یؤنه‌تیمی، ۱۷ ژانویه‌ده تهران ائلچیسینی گئری چاغیرما قراری آلارکه‌ن سفر مقصدی ایله اؤلکه‌سینده اولان ایرانین اسلام آباد ائلچیسینین ده بیر مدت گئری قاییدابیلمه‌یه‌جگینی تهرانا بیلدیرمیشدی.
ایران، ۱۵ ژانویه‌ده ده ترور هؤرگوتلری و ایسرائیل استخباراتینی هدف آلما سببی ایله عراقین قوزئیینه موشک سالدیریلاری تشکیل ائتمیشدی.
عراقلی ایداره‌چیلر ایرانا سرت تپکی وئریب سببلرین اساسسیز اولدوغونو و اگمنلیک حاقلارینی پوزدوغونو ایفاده ائتمیشدی.
