Ärdoğan belän Çolaku urtaq matbuğat cıyılışı ütkärde

Törkiyä ilbaşı Räcäp Tayyip Ärdoğan räsmi säfär belän başqala Änkarağa kilgän Rumıniyä xökümäte räise Marçel Çolaku belän bergä matbuğat oçraşuı uzdırdı.

Anda Ärdoğan ike il arasında säwdä äyläneşeneñ 2 yıl ber-ber artlı 10 milliard dollardan uzıp kitüen, maqsrtnıñ bu kürsätkeçne 15 milliard dollarğa citkerü buluın söyläde. Ul Rumıniyä belän ikeyaqlı bularaq ta, NATO tübäse astında da bergä êşçänlek başqarıp töbäkneñ iminlege häm totrıqlılığına öleş kertülären belderde. “PKK” häm “FETO” şikelle terrorçı oyışmalarqa qarşı köräştä dä Rumıniyädän närsä kötüebezne xörmätle xökümät räisenä citkerdek”,-dide Ärdoğan.  

İlbaşı Rumıniyädä yäşäwçe törek häm törki-tatar cämäğat’çeleklären dä ike däwlät arasında duslıq küpere itep kürülären äytte. “Qardäşlärebezneñ rumınnar belän dus-tatu yäşäwlärenä şatlanabız. Moña mömkinlek tudırğan Rumıniyä idaräsenä räxmät. Forsattan faydalanıp, Rumıniya watandaşlarınıñ ilebezgä tanıqlıq belän kerä aluın täêmin itäçäk tözätmälärne tormışqa aşıruıbıznı äytergä telim. Şul räweşle keşelek mönäsäbätlärebezneñ artaçağına ışanam”,-dide Ärdoğan.  

Rumıniyä xökümäte räise Marçel Çolaku isä matbuğat cıyılışındağı çığışında bolay dide: “Törkiyäneñ Awrupa Berlege tışındağı töp iq’tisadi xezmättäşebez, NATOdağı iñ ähämiyätle berlektäşlärebezneñ berse, strategik regional’ xezmättäş, yaxşı kürşe häm dus buluın äytä alam”.  

Ärdoğan belän räsmi qunaq matbuğat cıyılışınnan alda qara-qarşı söyläşü uzdırdı, soñınnan Rumıniyä yuğarı däräcäle strategik xezmättäşlek şurasınıñ berençe utırışında qatnaştı. Monnan tış, ike il arasında 6 kileşü imzalandı.