"Mönäsäbätlär däwamlı uñay yaqqa bara"

Törkiyä ilbaşı Räcäp Tayyip Ärdoğan räsmi säfär belän kiçä başqala Änkarağa kilgän Greśiya prem’yer-ministrı Kiryakos Miśotakis belän küreşep söyläşkännän soñ matbuğat oçraşuında çığış yasadı.

Qunaq prem’yer-ministr belän uzğan söyläşüdä ike yaqlı mäs’älälärne bar yaqlap küzdän kiçerülären, säwdä külämen 6dan 10 milliard dollarğa citkerü maqsatın quyuların assızıqlağan Ärdoğan tübändägeçä däwam itte: “Greśiya belän terrorçılıqqa qarşı köräş mäs’äläsendä añlayışıbız könnän-kön nığıy bara. Terror oyışmaları öçen töbägebezneñ kiläçägendä urın bulmawı turında kileştek. Mönäsäbätlärebezdäge uñay atmosferanıñ Greśiyadäge törek azçılığı häm qawemdäşlärebezneñ xoquqlarına çağıluın kötäbez.”

Kipr problemasınıñ utrawdağı çınbarlıqlar nigezendä ğadel, daimi çişeleşkä qawışuınıñ möhim buluın beldergän Törkiyä ilbaşı: “Mondıy adım töbägebezneñ totrıqlılıq häm xozurın nığıtaçaq,” – dide.

Gresiya prem’yer-ministrı Miśotakis isä çığışında: “Arabızdağı añlayış häm mönäsäbätlär däwamlı uñay yaqqa bara,” – diyep, Törkiyäneñ Awrupa Berlegenä äğza buluın xuplawların äytte.